QazTransOıl 13 mlrd teńgege tender ótkizý kezinde basy artyq talaptar qoıǵan

ASTANA. QazAqparat - Bas kólik prokýratýrasy «QazTransOıl» AQ qyzmetinde áleýetti ónim berýshilerge artyq biliktilik talaptaryn qoıý arqyly jasandy shekteý faktilerin anyqtady, dep habarlaıdy QazAqparat.

Mysaly, qoǵam ashyq konkýrs tásilimen avtokólik quraldaryn jalǵa alý qyzmetin jalpy somasy 12,8 mlrd teńgege satyp alýdy josparlaǵan.

Osyǵan qaramastan avtomobılderdi jalǵa alý úshin qajet etpeıtin «jol ınspektory/tehnık/ınjener-mehanık» mamandyǵy boıynsha dıplomdar bolýy shart retinde qoıylǵan.

Ulttyq operatordyń ákimshilik ǵımaratyn kútip ustaý jónindegi qyzmetterdi 460 mln teńgege satyp alý kezinde de osyndaı jaǵdaı boldy.

Tenderlik qujattama boıynsha kásipker kúzet qyzmeti boıynsha lıtsenzııanyń, sondaı-aq qaldyqtardy suryptaý men joıý boıynsha ruqsat qujattardyń bar ekenin rastaýǵa tıis bolǵan.

Prokýratýra aktisi boıynsha joǵaryda atalǵan tenderler adal básekelestik qaǵıdattarynyń buzylýyna baılanysty joıyldy.

Foto: gov.kz