«Qazteleradıo» 11 mln teńgeden astam aıyppul tóleıtin boldy

ASTANA. QazAqparat - Qazaqstan Respýblıkasy Ulttyq ekonomıka mınıstrligine qarasty tabıǵı monopolııalardy retteý, básekelestikti jáne tutynýshylardyń quqyqtaryn qorǵaý komıteti «Qazteleradıo» AQ-ǵa qatysty júrgizilgen tekserýdi aıaqtady, dep habarlaıdy QazAqparat.

Tekserý, atap aıtqanda, Qazaqstan Respýblıkasy Kásipkerlik kodeksiniń 174-babynyń 2-tarmaqshasynda kózdelgen ústem nemese monopolııalyq jaǵdaıdy teris paıdalaný zańnamasynyń buzylýyna baılanysty júrgizildi.

«Aktsıonerlik qoǵamnyń áreketterinde telekommýnıkatsııalyq jabdyqtardy saqtaý jónindegi qyzmetterge naryq sýbektilerimen nemese tutynýshylarmen jasalǵan máni birdeı kelisimderge obektıvti túrde aqtalmaıtyn sebeptermen ártúrli baǵalardy nemese ártúrli sharttardy qoldaný boıynsha el zańnamasyn buzý faktisi anyqtaldy. Almaty qalasynyń mamandandyrylǵan aýdanaralyq ákimshilik soty 2018 jylǵy 20 qarashadaǵy qaýlymen atalmysh kompanııany quqyq buzýshylyq jasaǵany úshin kináli dep tanydy jáne 11 618 205,36 teńge mólsherinde aıyppul saldy» delingen habarlamada.

Budan basqa, aktsıonerlik qoǵamǵa Kásipkerlik kodeksiniń normalaryn buzý faktilerin toqtatý jáne onyń saldaryn joıý jóninde nusqama berildi.