«Qazsýshar» sottalǵan qyzmetkerlerine qatysty shara qabyldamaǵan - mınıstr

NUR-SULTAN. QazAqparat - «Qazsýshar» kásiporyny sotty bolǵan qyzmetkerlerine qatysty shara qabyldamaǵan. Bul týraly QR Ekologııa, geologııa jáne tabıǵı resýrstar mınıstri Maǵzum Myrzaǵalıev vedomstvonyń keńeıtilgen alqa otyrysynda aıtty, dep habarlaıdy QazAqparat tilshisi.

«Bolat Sabyruly, Qazaqstan Respýblıkasynyń Sybaılas jemqorlyqqa qarsy is-qımyl agenttigi sizdiń kásiporynǵa sybaılas jemqorlyq táýekelderi boıynsha syrtqy taldaý júrgizdi. Tıisti usynystar berildi. Alaıda, osy ýaqytqa deıin sotty bolǵan qyzmetkerlerge qatysty shara qabyldanbaǵan. Zańsyz is-áreketter saldarynan kásiporynǵa keltirilgen zalaldy óteýge baǵyttalǵan talap qoıý jumystary tolyq kólemde júrgizilmegen. Memlekettik satyp alýdy bir kúndik kompanııalar utady. Jalpy, álsiz jumys júrgizilýde», - dedi Maǵzum Myrzaǵalıev «Qazsýshar» kásipornynyń bas dırektory Bolat Arystanbaevqa qarata.

Osyǵan baılanysty mınıstr vedomstvoǵa qarasty Sý resýrstary komıtetiniń tóraǵasy Arman Turlybekke bul máseleni jeke baqylaýǵa alýdy tapsyrdy.

«Al Bolat Sabyruly osy baǵytta jumysty kúsheıtýi kerek», - dedi ol.