«Qazsýshar» kanaly jeke menshikke berilgeni ras pa
«Birinshiden, mashınalyq kanal «SK Parasat» JShS-niń jeke menshigine berilmedi jáne ony memlekettik menshikke qaıtardy degen aqparat durys emes.
Ekinshiden, «SK Parasat» JShS-men kanal arnasynyń bóligin jáne GNS-1 irgeles aýmaqtardy saz-batpaq jáne qum tárizdi shógindilerden tazartý jóninde 26.06.2023 jylǵy №01 kelisimshart jasaldy.
Jasalǵan sharttyń talaptaryna qaramastan, «SK Parasat» JShS kanalǵa irgeles aýmaqtardan óz betinshe qum óndirýdi jáne keıinnen sata bastaǵanyn eskere otyryp (bul zańsyz qyzmet kanaldyń ekologııasy men negizgi bóliginiń buzylýyna ákeldi), «Qazsýshar» RMK 2023 jylǵy qazanda osy kelisimshartty buzý rásimin bastady.
Úshinshiden, «Qazsýshar» RMK atynan kanal arnasyn tazartý kelisimshartyn buzý boıynsha sot organdaryna birneshe talap-aryz berildi. Máselen, 2023 jyldyń qazan aıynda Túrkistan oblysynyń Mamandandyrylǵan aýdanaralyq ekonomıkalyq sotyna aryz berilip, osy kezeńde jergilikti quqyq qorǵaý organdaryna ótinish joldandy. Ótinishterdiń qorytyndysy boıynsha «SK-Parasat» JShS-ne qatysty QR QK 334-babynyń 2-bóligi boıynsha (jer qoınaýyn óz betinshe paıdalaný, paıdaly qazbalardy óz betinshe óndirý) qylmystyq is qozǵaldy. Búgingi tańda is sotqa deıingi tergeý satysynda», - delingen habarlamada.
«Qazsýshar» RMK aryzy boıynsha Túrkistan oblysynyń Mamandandyrylǵan tabıǵat qorǵaý prokýratýrasy «SK Parasat» JShS qyzmetin tekserdi jáne onyń qorytyndysy boıynsha anyqtalǵan buzýshylyqtardy joıý jóninde uıǵarym berildi.
Odan keıin, «Qazsýshar» RMK atynan ýákiletti organ retinde Sý sharýashylyǵy komıteti 2024 jylǵy sáýirde Astana qalasynyń Mamandandyrylǵan aýdanaralyq ekonomıkalyq sotyna talap-aryz joldady. Protseske qatysýshylardyń ótinishi boıynsha sot talqylaýy barysynda Túrkistan oblysynyń mamandandyrylǵan tabıǵat qorǵaý prokýratýrasynyń prokýrory úshinshi tulǵa retinde tartyldy.
Birinshi satydaǵy sot aryzdy qanaǵattandyrmady. Biraq Sý sharýashylyǵy komıtetiniń, «Qazsýshar» RMK, Astana q. prokýratýrasynyń jáne Túrkistan oblysynyń Mamandandyrylǵan tabıǵat qorǵaý prokýratýrasynyń apellıatsııalyq shaǵymdary boıynsha 25.07.2024 j. Astana q. apellıatsııalyq sot alqasy birinshi satydaǵy sottyń sheshimin joıyp, talap qanaǵattandyryldy (ıaǵnı, kelisimshart jaramsyz dep tanyldy).
Tórtinshiden, «Qazsýshar» RMK 2024 jylǵy aqpanda Bas prokýratýraǵa, Sybaılas jemqorlyqqa qarsy qyzmetke jáne Qarjy monıtorıngi agenttigine «Qazsýshar» RMK burynǵy laýazymdy tulǵalarynyń zańsyz áreketteri jáne «SK Parasat» JShS zańsyz kásipkerlik qyzmeti faktisi boıynsha tıisti sharalar qabyldaý úshin aryz joldady.