KazSat júıesin Qyrǵyzstan men Ózbekstan keńistigine shyǵarý jumystary júrgizilýde
Qazirgi tańda Qazaqstanda eki ǵaryshtyq júıe bar. Atap aıtqanda, olardyń qatarynda «KazSat-2» jáne «KazSat-3» baılanys spýtnıkterinen turatyn «KazSat» ǵaryshtyq baılanys júıesi, sonymen qatar «KazEOSat-1» men «KazEOSat-2» Jerdi qashyqtyqtan zondtaý spýtnıkterin qamtıtyn ekinshi júıe jumys isteýde.
«Búginde «KazSat» ǵaryshtyq baılanys júıesi qyzmetterin tek otandyq uıymdar, sonyń ishinde Qazaqstan Respýblıkasynyń iri telekommýnıkatsııa operatorlary, ulttyq kompanııalar, áleýetti qurylymdar, quqyq qorǵaý organdary, memlekettik mekemeler, sondaı-aq eldiń jeke kompanııalary qoldanady. Sonymen qatar, «KazSat» ǵaryshtyq baılanys júıesinde Tájikstan, Ózbekstan, Qyrǵyzstan jáne Reseı Federatsııasy sekildi shekaralas memleketterdiń aýmaǵynda bekitilgen spýtnıktik baılanys qyzmetterin usyný múmkindigi bar. Shekaralas memleketter naryǵyna shyǵý boıynsha jumystar júrgizilýde. Biz úshin jeke ǵaryshtyq baılanys júıeleri joq Qyrǵyzstan, Ózbekstan, Tájikstan tárizdi elder naryǵynyń mańyzdylyǵy basym», - dep atap ótilgen QR Qorǵanys jáne aeroǵarysh ónerkásibi mınıstrligi málimetinde.
Sonymen qatar vedomstvo ókilderi 2017 jyly «KazSat» ǵaryshtyq baılanys júıesiniń qyzmetterin usynýdan túsken taza tabysy boıynsha aqparat qarjylyq eseptiliktiń aýdıtorlyq qorytyndysy nátıjesinde ǵana belgili bolatynyn atap ótti. Shamamen 2018 jyldyń naýryz-sáýiri kezinde naqty tabys kólemi jarııalanbaq.
«Qazaqstannyń Jerdi qashyqtyqtan zondtaý ǵaryshtyq júıesine keletin bolsaq, qazirgi tańda atalǵan ǵaryshtyq júıesiniń qyzmetteri men ónimderin tek Qazaqstanda ǵana emes, sonymen qatar shet elderinde de keńinen paıdalanady. Máselen, Jerdi qashyqtyqtan zondtaý ǵaryshtyq júıesiniń ulttyq operatory QR QAÓM Aeroǵarysh komıtetiniń «Qazaqstan Ǵarysh Sapary» UK» AQ syrtqy naryqta Jerdi qashyqtyqtan zondtaý ǵaryshtyq júıesiniń ónimderi men qyzmetterin ilgeriletý maqsatynda Frantsııa, Ispanııa, Ulybrıtanııa, Reseı, AQSh sekildi memlekettermen tyǵyz jumys atqarýda. Búginge «Qazaqstan Ǵarysh Sapary» UK» AQ-nyń 2016-2017 jyldary syrtqy naryqta Jerdi qashyqtyqtan zondtaý málimetterin kommertsııalyq iske asyrýdan túsken jalpy tabysy 133 mln teńgeni quraıdy», - dep atap ótilgen mınıstrlik derekterinde.