«KazSat-3» ǵaryshtyq baılanys júıesin qurý jobasy nátıjelerin qabyldaý aktisine qol qoıyldy

ASTANA. QazAqparat - 23 qańtarda «Qazǵarysh» tóraǵasynyń orynbasary E.Shaımaǵambetovtyń basshylyǵymen QR Investıtsııalar jáne damý mınıstrliginiń Aeroǵarysh komıtetiniń buıryǵymen qurylǵan qabyldaý komıssııasy Aqkól qalasyndaǵy ǵarysh apparattaryn jerde basqarý kesheninde boldy.

Qabyldaý komıssııasyna keshen jumysy kórsetildi, «Ǵarysh baılanysynyń respýblıkalyq ortalyǵy» AQ jáne akademık M.F.Reshetnev atyndaǵy «Aqparattyq spýtnıktik júıeler» AAQ ókilderiniń baıandamalary tyńdaldy. Qabyldaý komıssııasy «KazSat-3» ǵaryshtyq baılanys júıesin qurý jobasynyń aıaqtalýy boıynsha nátıjelerdi qabyldaý týraly aktige qol qoıdy, dep habarlady «Qazǵarysh» baspasóz qyzmetinen. «KazSat-3» ǴA shtattyq rejimde jumys isteıdi. Birinshi bolyp «KazSat-3» spýtnıginiń qyzmetin «Astel» AQ jáne «2DayTelecom» JShS qazaqstandyq baılanys operatorlary paıdalandy. Osylaısha, Memlekettik komıssııanyń sheshimimen «Ǵarysh baılanysynyń respýblıkalyq ortalyǵy» AQ «KazSat-3» ǴA jerseriktik resýrsynyń qyzmetin kommertsııalyq turǵyda júzege asyrýǵa kiristi.