«KazSat-3» ǴA-ny tehnıkalyq sıpattamalarǵa sáıkestigine synaý aıaqtaldy

ASTANA. QazAqparat - Kelisimshartqa sáıkes, «KazSat-3» spýtnıgi ushyrylǵannan keıingi kezeńde ushý-konstrýktorlyq synaýlar júrgiziledi. Osynyń aıasynda ǵarysh apparattarynyń paıdaly júktemesin tekserý jumystary qamtylady. Paıdaly júktemeniń tehnıkalyq parametrlerin tekserý bıylǵy 18-25 maýsym aralyǵynda «Akademık M.F.Reshetnev atyndaǵy aqparattyq spýtnıktik júıeler» AAQ jáne «ThalesAleniaSpace» kompanııasynyń mamandarymen birlesip júrgizilgen bolatyn.

«Ótkizilgen test nátıjeleri talap etiletin tehnıkalyq mindetterge tolyq sáıkestigin kórsetti. «KazSat-3» ǴA paıdaly júktemesin jasaýshy - «ThalesAleniaSpace» kompanııasy mamandarynyń paıymdaýynsha, barlyq tekserister oń nátıjelermen tolyq kólemde ótkizildi»,-delingen Qazǵaryshtyń baspasóz qyzmetiniń málimetinde. Aıta keteıik, 2014 jylǵy 28 sáýirde «Baıqońyr» ǵarysh aılaǵynan «KazSat-3» úshinshi qazaqstandyq ulttyq geostatsıonarlyq baılanys jáne habar taratý spýtnıgi sátti ushyryldy. Sátti ushyrylymnyń arqasynda qazirgi tańda orbıtada Qazaqstannyń eki baılanys spýtnıgi bar. «KazSat-2» jáne «KazSat-3» ǵarysh apparattarynyń resýrstary qazaqstandyq televızııalyq habar taratý, bekitilgen baılanys, ınternet jáne derekterdi taratý naryǵynyń qajettilikterin qanaǵattandyrýǵa baǵyttalǵan.