«KazSat-2» jelisindegi memlekettik telearnalar ádettegideı habar taratady – Qazteleradıo

«Qazteleradıo» AQ qazaqstandyq KazSat-3 spýtnıgindegi tótenshe jaǵdaıǵa baılanysty OtauTV paketterindegi keıbir qazaqstandyq jáne sheteldik telearnalar jumys istemeı turǵanyn málim etti, dep habarlaıdy QazAqparat.

«Qazir «Qazteleradıo» AQ Ǵaryshtyq baılanys ortalyǵymen birlesip KazSat-3 qyzmetin qalpyna keltirý úshin jumys júrgizip jatyr. Bul rette KazSat-2 jelisin paıdalanatyn memlekettik telearnalar ádettegideı habar taratady. Barlyq 567 radıo-televızııalyq stantsııa KazSat-2 rezervtik jerseriginen telearnalardy qabyldap, Qazaqstan Respýblıkasynyń búkil aýmaǵyna taratady», - dep habarlady «Qazteleradıo» AQ baspasóz qyzmetinen.

Buǵan deıin KazSat-3 jer serigindegi tótenshe jaǵdaıǵa baılanysty Tsıfrlyq damý, ınnovatsııalar jáne aeroǵarysh ónerkásibi mınıstrligi túsinik bergen bolatyn.