KazSat-2-ni almastyratyn jańa spýtnık qandaı bolmaq
«KazSat-2R» spýtnıgin qoldanysqa engizý - birinshi kezekte qazirgi kezdegi spýtnıktik baılanys pen teleradıo habarlaryn taratý jelileriniń jumysyn turaqty túrde qamtamasyz etýge negizdelgen. Bul turǵyda Qazaqstannyń barsha aýmaǵynda ornalasqan 4 000 jýyq jerdegi spýtnıktik baılanys stansalary bar. Sondaı-aq spýtnıktik baılanys boıynsha 12 operatordyń jáne uıymdardyń qajettigin qamtamasyz etý eskerilgen», - dep atap ótilgen mınıstrliktiń Parlament Májilisindegi «Halyq kommýnısteri» fraktsııasynyń depýtattyq saýalyna bergen jaýabynda.
Vedomstvo málimetinshe, «KazSat-2R» jobasy aıasynda joǵary jyldamdyqty Internetke qoljetimdilikti tolyqtaı qamtý maqsatyn sheshýge múmkindik beriledi. Bul óz kezeginde Qazaqstan ekonomıkasy salalaryn tsıfrlandyrýǵa jaǵdaı jasaıdy. «Osy jaǵdaıda perspektıvaly spýtnık aýyldyq eldi mekenderde keń jolaqty Internet jelisin jáne uıaly baılanysty qurý úshin jumys isteıdi. Sonymen qatar jer serigi qoldanystaǵy spýtnıktik baılanys jelileri men teleradıo habar taratý qyzmetin uıymdastyrýǵa baǵyttalǵan», - deıdi mınıstrlik ókilderi. Qazirgi ýaqytta jańa spýtnıktiń tehnıkalyq keskini múddeli memlekettik organdarmen birlese pysyqtalýda. Sonymen qatar tehnıkalyq sheshimderdiń túrli nusqalary da qarastyrylyp jatyr. Belgili bolǵandaı, vedomstvoaralyq jumys tobynyń qorytyndysy bıylǵy qarashanyń sońynda jasalady jáne osy jumystar Úkimettiń qaraýyna engizilmek.
Budan buryn habarlanǵandaı, QR Qorǵanys jáne aeroǵarysh ónerkásibi vıtse-mınıstri Marat Nurǵojın Qazaqstanda «KazSat-2» jer serigi aýystyrylatynyn aıtty. «KazSat-2» jer seriginiń jumys ýaqyty 2023 jylǵa deıin negizdelgen, ıaǵnı ol 12,5 jyl qyzmet etýi tıis (2011 jyly ǵaryshqa shyǵaryldy). Sondyqtan biz osy jyldan onyń ornyna jańa ǵarysh apparatyn daıyndaý jobasyn iske asyrýdy bastadyq. («KazSat-2R»). 2023 jyly jańa spýtnıkti sol núktege ornalastyramyz jáne bul sharalar baılanys operatorlaryna kedergi keltirmeıdi»,-degen edi Májilistegi Úkimet saǵatynan keıin. Onyń sózine qaraǵanda, «KazSat-2» salynǵan aqshany 2018 jyly, al «KazSat-3» 2021 jyly aqtap, osydan keıin taza kiris ákeledi.