Kazsat-2 baılanys spýtnıgi orbıtada 4 myńynshy aınalymyn jasady

NUR-SULTAN. QazAqparat – Qazaqstannyń Kazsat-2 baılanys jáne habar taratý spýtnıgi orbıtada 4 myń táýlikten astam ýaqyt jumys istep keledi. Mundaı statıstıkany «Aqkól» ǵarysh baılanys ortalyǵynyń (ǴBO) ınjenerleri aıtty, dep habarlaıdy QazAqparat tilshisi.

«Ǵarysh qurylǵysy shtattyq rejımde jumys istep jatyr, bort júıesinde eshqandaı aqaý joq», - dedi basshylyq spýtnıktiń jaǵdaıy týraly.

«Spýtnıkti basqarý ońaı bolyp kóringenimen, munda úlken ujym jumys isteıdi: ballıstıka mamandary, bort júıesiniń taldaýshylary men ǵarysh qurylǵysyn basqarý mamandary. Olardyń kóbisi ujymda spýtnık alǵash ushyrylǵan kúnnen bastap eńbek etýde. Biz úshin 4000 aınalym nemese Kazsat-2 spýtnıginiń ushqanyna 4000 táýlik tolýy – mańyzdy oqıǵa», - dedi «Aqkól» ǴBO Ushýdy basqarý ortalyǵynyń basshysy Bekbolot Azaev.

Kazsat-2 ǵarysh apparaty ushý kezinde 61,23 kg otyn (ksenon) jumsady. Qalǵany - 78,77 kg. Eseptelgen málimetter boıynsha, otyn 2027 jylǵa deıin jetedi.

2021 jyly júrgizilgen tehnıkalyq aýdıt negizinde Kazsat-2 spýtnıgin paıdalanýdyń eseptik merzimi 2023 jyldan bastap 2026 jyldyń sońyna deıin uzartyldy.

KazSat-2 ǵarysh apparaty 2011 jylǵy 16 shildede Baıqońyr ǵarysh aılaǵynan geostatsıonarlyq orbıtaǵa (GSO) ushyryldy. Bul spýtnık teleradıo habarlaryn taratý, telefonııa, ınternet jelisine qoljetimdilik, derekterdi berý qyzmetterin usynady. KazSat-2 Qazaqstan Respýblıkasynyń búkil aýmaǵyna, Ortalyq Azııa elderine, Reseıdiń ortalyq bóligine qyzmet kórsetedi.