Qazposhta qazaqstandyqtardy alaıaqtarǵa aldanyp qalmaýyn eskertti

NUR-SULTAN. QazAqparat – Qazposhta jelide alaıaqtar paıda bolǵanyn eskertti, dep habarlaıdy QazAqparat tilshisi.

«Jelide alaıaqtyq jaǵdaılar paıda boldy. Olar kelesi shema boıynsha júzege asyrylady: óz taýarlaryn ınternet arqyly satatyn satýshyǵa tólem jasaý úshin https://post.kz.obyiva.com saıtyna silteme jiberedi. Osy silteme boıynsha olarǵa kartanyń derektemelerin toltyrý jáne ony iske qosý usynylady, derekter rastalǵannan keıin aqsha satýshynyń shotynan avtomatty túrde alynady.

Eskertemiz! Qazposhta kórsetilgen saıtqa qatysy joq jáne biz taýarlardy onlaın satý-satyp alý kezinde barlyǵyńyzdy muqııat bolýdy suraımyz», delingen kompanııanyń Facebook -tegi paraqshasynda.