Qazposhta: Endi robot adresatqa sálem-saýqattyń kelip jetýi týraly habarlaıdy (FOTO)

ASTANA. QazAqparat - «Qazposhta» AQ klıentterdi sálem-saýqattyń kelip jetýi týraly qalalyq telefon arqyly habarlandyrý qyzmetiniń iske qosylǵanyn habarlaıdy. Qyzmettiń bul túri eldiń barlyq oblys ortalyqtarynda, sondaı-aq Astana men Almaty qalalarynda jumys isteıdi.

«Qalalyq telefonmen avtohabarlandyrýdy robot jasaıdy. Ol klıentke sálem-saýqattyń túri, onyń trek nómiri jáne poshtalyq jóneltimdi alýǵa bolatyn bólimsheniń mekenjaıyn habarlaıdy. Dybystyq habarlandyrýdy úndestik rejıminde «1» sanyn basyp qaıta tyńdaýǵa bolady. Atalǵan júıe klıentterge avtomatty túrde kúnine 3 ret, jumys kúnderi saǵat 8:00-den 21:00-ge deıin jáne demalys kúnderi saǵat 10:00-den 21:00-ge deıin, dybystyq habarlama tyńdalmaǵansha telefon soǵady», - dep túsindirdi «Qazposhta» AQ baspasóz qyzmetiniń basshysy Baıram Ázizov.

Qazirgi ýaqytta klıentter 22 myńnan astam qońyraý qabyldady, sonyń 2 myńy qaıta tyńdaldy. Sondaı-aq 2014 jyldyń jeltoqsan aıynan bastap Qazposhta klıentterdi SMS-habarlandyrý qyzmetin iske qosqan. Sol ýaqyttan beri 5 mln.-nan astam habarlandyrý jiberilgen.

«Qazposhta» AQ - Qazaqstan Respýblıkasynyń poshta, qarjylyq jáne logıstıkalyq qyzmet kórsetetin poshta baılanysynyń ulttyq operatory. «Qazposhta» AQ búkilálemdik poshta odaǵynyń múshesi, Posteurop Eýropalyq poshta operatorlary qaýymdastyǵynyń múshesi, VISA International jáne MasterCard Worldwide halyqaralyq tólem júıeleriniń qatysýshysy bolyp tabylady. Kompanııanyń jalǵyz aktsıoneri - «Samuryq Qazyna» AQ.