Qazposhta basshysy aýyldaǵy qyzmetkerlerdiń jalaqysy nege az ekenin túsindirdi

<p>Búgin Parlament Májilisinde&laquo;Qazposhta&raquo; AQ júıesin damytý taqyrybyn talqylaý kezinde depýtat Maqsat Tolyqbaı poshta jetkizetin qyzmetkerlerdiń jalaqysyn ósirý máselesin kóterdi, dep habarlaıdy <a href="https://kaz.inform.kz/" target="_blank" rel="noopener">QazAqparat</a> tilshisi.</p>

«Gazet-jýrnaldarǵa qatysty másele bar, kóp jaǵdaıda aýyldarǵa ýaqtyly jetpeıdi. Aqshasy tólengen soń, kelýi kerek qoı. Gazetti jetkizý boıynsha memlekettik tapsyrma bar, sýbsıdııa berip jatyr. Biraq gazet jetkizetin, poshtada isteıtin maman tabý qıyn. Poshtashylardyń ortasha jalaqysy – 140-146 myń teńge. Elimizdiń shyǵysyna jańa ǵana habarlastym. Qansha alasyńdar desem, 30 myń alamyz deıdi. Gazet taratamyz, zeınetaqy beremiz, qosymsha jetkizýler bolady deıdi. Biraq aılyǵy – 30 myń teńge, ol shaılyǵyna da jetpeıdi. Biraq kompanııanyń tabysy 8 aıda 58 mlrd teńge dep aıttyńyzdar. Sol tapqan tabys qaıda ketip jatyr? «Samuryq-Qazynaǵa» aqshany qaıtaryp beresizder me?», - dedi M. Tolyqbaı.

Óz kezeginde «Qazposhta» AQ basqarma tóraǵasy Ásel Janasova aýyldaǵy poshta qyzmetkerleri kúnine eki saǵat jumys isteıtinin, sondaı-aq jalaqyny ósirýge qosymsha qarajat qarastyrylatynyn aıtty.

«Atap aıtqanda, aýylda poshta qyzmetkerleri buıryq boıynsha aptasyna eki ret shyǵady. Al bizdiń tólem saǵatyna eseptelip tólenedi. Óz jumysyn aıaqtap, poshtany taratyp berip, sol úshin aqshasyn alady. 146 myń alatyn qyzmetkerler tańǵy saǵat 9-dan keshki 6-ǵa deıin jumys isteıdi. Aýyldaǵy qyzmetkerler 2 saǵat qana jumys isteıdi. Sol úshin jalaqylary osyndaı», - dedi kompanııa basshysy.

Onyń aıtýynsha, bıyl jalaqyny 25% kóterý úshin qosymsha qarajat kerek.

«Ol aqshany qaıdan alamyz? Memleket bizge ol aqshany bermeıdi. Sondyqtan biz servısterdi damytyp, ony ózimiz tabamyz», - dedi Ásel Janasova.