«Qazposhta» aýyldaǵy bólimshelerin jappaıdy - B. Mýsın

ASTANA. QazAqparat - «Qazposhta» AQ óziniń aýyldaǵy bólimshelerin jappaıdy. Búgin «Samuryq-Qazyna» Ulttyq Ál-aýqat Qory» AQ Basqarma tóraǵasy Ómirzaq Shókeevtiń qatysýymen ótken keńeste «Qazposhta» AQ Basqarma tóraǵasy Baǵdat Mýsın osylaı aıtty.

Kompanııa basshysynyń sózine qaraǵanda, búgingi kúni «Qazposhta» fılıaldyq jelisi eń aýqymdy júıe bolyp tabylady. Atap aıtqanda, respýblıka boıynsha poshta baılanysynyń 3 131 statsıonarlyq óndiristik nysandary jumys istep tur. Onyń 2 185-i aýyldyq eldi mekenderde. «Respýblıkamyzdyń aýmaǵyndaǵy aýyldardyń 90 paıyzy negizgi qarjylyq qyzmet túrlerine qoljetimdilikti kompanııa bólimsheleri arqyly júzege asyrady. Biz óz isimizge jaýap beremiz, al aýyldyq bólimshelerdi jabý - bul biz tańdaǵan jol emes. Sondyqtan da, biz transformatsııa aıasynda barlyq baǵyttardy qarastyramyz. «Qazposhta» AQ úshin osal dep sanalyp kelgen tusty eń kúshti jaqqa qaraı aýystyrmaqpyz», - dedi B.Mýsın.

Onyń sózine qaraǵanda, aldaǵy ýaqytta tabystylyq deńgeıin arttyrý, jańa jobalarǵa qarajat salyp, mekeme qyzmetkerleriniń jalaqysyn ósirý úshin kompanııa fılıaldardyń aýqymdy jelisin paıdalaný tásilderi qarastyrylady. «Osynyń barlyǵy kompanııa qyzmetkerleriniń jańa tehnologııalardy qanshalyqty tıimdi paıdalana alatyndyǵyna baılanysty bolyp tabylady», - dedi «Qazposhta» basshysy.