«Qazpochta» AQ Basqarmasynyń tóraǵasy saılandy

ASTANA. QazAqparat - Kompanııanyń Dırektorlar keńesiniń sheshimimen «Qazpochta» AQ Basqarmasynyń tóraǵasy bolyp Baǵdat Batyrbekuly Mýsın saılandy. 2014 jylǵy 1 tamyzda kompanııa ujymyna jańa basshy tanystyryldy, pochtanyń baspasóz qyzmetinen.

Baǵdat Mýsın 1983 jyly 3 naýryzda Pavlodar oblysynda dúnıege keldi. Súleımen Demırel atyndaǵy ýnıversıtetti jáne Almaty q. Qazaq quqyqtaný jáne halyqaralyq qatynastar ınstıtýtyn bitirgen.

Eńbek jolyn 2004 jyly «Ulttyq aqparattyq tehnologııalar» AQ-da bastady. 2007 jylǵa deıin bas ınjener-baǵdarlamashy, memlekettik organdardyń kýálandyrýshy ortalyǵynyń bólim bastyǵy (joba menedjeri) jáne memlekettik organdarda ІT-qurylymdardy qurý jónindegi departament dırektorynyń orynbasary qyzmetterinde jumys jasady.

Sondaı-aq, 2004 jáne 2008 jyldar aralyǵynda «AMANAT-insurance» saqtandyrý kompanııasy» AQ Basqarma tóraǵasynyń kómekshisi qyzmetin atqardy, onda ol «UAT» AQ jumysymen qatar kompanııany damytý jáne aqparattyq tehnologııalar protsesterin ońtaılandyrý jónindegi máselelermen aınalysty.

2007 jyldyń sońynan bastap QR Ádilet mınıstrliginiń «Respýblıkalyq quqyqtyq aqparat ortalyǵy» RMK aqparattyq júıelerdi súıemeldeý bóliminiń bastyǵy qyzmetin atqardy.

2008-2010 jyldary QR Ádilet mınıstriniń Aqparattyq tehnologııalar jónindegi keńesshisi, aqparattyq tehnologııalar basqarmasynyń bastyǵy qyzmetin atqardy.

2010 jáne 2011 jyldar aralyǵynda Aqparattyq tehnologııalar salasyndaǵy memlekettik saıasat departamenti dırektorynyń orynbasary bolyp qyzmet etti.

2011 jáne 2012 jyldar aralyǵynda QR BAM Memlekettik qyzmetterdi avtomattandyrýdy baqylaý jáne HQO qyzmetin úılestirý komıteti tóraǵasynyń orynbasary bolyp qyzmet etti.

2012 jyldan bastap QR Kólik jáne kommýnıkatsııa mınıstrliginiń Memlekettik qyzmetterdi avtomattandyrýdy baqylaý jáne HQO qyzmetin úılestirý komıteti tóraǵasynyń laýazymyn atqardy.

2014 jyldyń sáýirinde «Ulttyq aqparattyq tehnologııalar» AQ Basqarma tóraǵasy bolyp taǵaıyndaldy.