Kaznedra platformasy: Testileý rejıminde jer qoınaýy týraly aqparat beretin portal iske qosylady

NUR-SULTAN. QazAqparat – Qylmystyq isterdiń 90 paıyzdan astamy elektrondyq formatta júrgizilip jatyr. Bul týraly Úkimet otyrysynda tehnologııalyq serpilis ulttyq jobasyn talqylaý kezinde Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Іshki ister mınıstrliginiń tsıfrlandyrý boıynsha júrgizgen jumystarynyń nátıjesinde beınebaqylaý kameralarynyń sany ósip, qylmystar men tártip buzýshylyqtardyń aldyn alýǵa oń yqpalyn tıgizdi. Polıtsııa qyzmetkerlerin planshettermen jabdyqtaý boıynsha da jaqsy ósim baıqalyp otyr. Osy oraıda qylmystyq isterdiń 90 paıyzdan astamy elektrondyq formatta júrgizilip jatyr», - dedi B. Mýsın.

Sonymen qatar ol «Kaznedra biryńǵaı platformasy» boıynsha 15 qyrkúıekten bastap testileý rejıminde minerals.gov.kz iske qosylatynyn aıtty.

«Qazirden bastap paıdalanýshynyń jeke kabınetinde ınteraktıvti kartaǵa basylǵan jer qoınaýy týraly bir jarym myń elektrondy esep bar. Osy jyldyń sońyna deıin biz jer qoınaýy boıynsha qosymsha 30 myń esepti elektrondyq nusqaǵa kóshiremiz. Buǵan qosa, platforma arqyly jer qoınaýyn barlaýǵa tıisti lıtsenzııaǵa ótinim berý jáne ýákiletti memlekettik organmen ózara elektrondy hat almasý múmkindigi jasaldy. Aldaǵy ýaqytta bul platforma jer qoınaýyn paıdalanýshylar úshin market place retinde qyzmet etedi», - dedi mınıstr.

Budan buryn habarlanǵandaı, memlekettik qyzmetterdi elektrondyq formatqa aýystyrý 94 paıyzǵa jetti.