QazMunaıGazdyń qaryzy 10 mlrd AQSh dollaryna jýyqtady

ASTANA. QazAqparat – «QazMunaıGaz» kompanııasy óziniń ınvestıtsııalyq tartymdylyǵyn kóterý jumystaryn júrgizdi. Bul týraly atalǵan kompanııany IPO-ǵa shyǵarýǵa arnalǵan jıynda «Samuryq-Qazyna» AQ aktıvterin qaıta qurylymdaý departamentiniń dırektory Dastan Adıhodjaev aıtty, dep habarlaıdy QazAqparat tilshisi.

«Sońǵy 8 jylda «QazMunaıGazdyń» qaryzy eki esege jýyq azaıdy. 2014 jyly bul kórsetkish 19,2 mıllıard AQSh dollary bolsa, qazir shamamen 10 mıllıard dollarǵa deıin azaıyp otyr», - dedi D. Adıhodjaev.

Onyń aıtýynsha, qazir «QazMunaıGaz» óziniń qaramaǵyndaǵy qajetsiz qurylymdardy joıyp, enshiles jáne táýeldi kompanııalardy tikeleı basqarap jatyr.

«QazMunaıGaz» IPO-syna qatysý arqyly adamdar munaı óndirý, tasymaldaý, qaıta óńdeý sııaqty qyzmetter usynatyn iri kompanııanyń úleskerine aınala alady. Bolashaq aktsıonerler kompanııa tabysynan dıvıdend retinde paıda kórý quqyǵyna ıe bolady.

«QazMunaıGaz» kompanııasynyń jalpy aktıvteri 32 mlrd dollardy qurap otyr. Dıvıdendter tóleý múmkindigi munaı baǵasyna baılanysty bolady.

Budan buryn habarlanǵandaı, 7 qarashada «Samuryq-Qazyna» qory «QazMunaıGaz» kompanııasynyń ózine tıesili úlesiniń 5 paıyzyn IPO-ǵa shyǵaratynyn resmı jarııalady.

Bul jolǵy ІRO aıasynda «QazMunaıGaz» kompanııasynyń «Samuryq-Qazynaǵa» tıesili 30,5 mln aktsııasy satylady.

Bir aktsııanyń quny 8406 teńge dep belgilengen. ІRO kelesi aıǵa deıin josparlanǵan. Naqtyraq aıtsaq, ınstıtýtsıonaldyq ınvestorlardan (zańdy tulǵalar) ótinim qabyldaý 9 qarashada bastalyp, 30 qarashada aıaqtalady. Al bólshek ınvestorlardan (jeke tulǵalar) ótinim qabyldaý 9 qarashada bastalyp, 2 jeltoqsanda saǵat 15.00-de aıaqtalady. «Samuryq- Qazyna» qory búkil ótinimderdi jınap, maquldaǵannan keıin satylǵan aktsııalar jeltoqsannyń birinshi onkúndiginde ınvestordyń shotyna túsedi.

Foto: kmginternational.com