QazMunaıGazdyń IPO-ǵa shyǵarylatyn aktsııalarynyń úlesi artýy múmkin

ASTANA. QazAqparat – «QazMunaıGaz» ulttyq kompanııasy aktsııalarynyń ótimdiligin ulǵaıtý maqsatynda IPO-ǵa shyǵarylatyn aktsııalarynyń úlesi artýy múmkin. Bul týraly «Samuryq-Qazyna» ulttyq ál-aýqat qory damytý jáne jekeshelendirý jónindegi basqarýshy dırektory Ernar Janádil málim etti, dep habarlaıdy QazAqparat tilshisi.

«QazMunaıGaz» ulttyq kompanııasy aktsııalarynyń 3%-y IPO-ǵa shyǵaryldy. Kompanııanyń 87% aktsııasy «Samuryq-Qazyna» qoryna tıesili. Bizde «Qazatomprom» analogi boıynsha qorǵa tıesili aktsııalar úlesin 75%-ǵa deıin azaıtýǵa múmkindik beretin Úkimet qaýlysy bar. Osy oraıda, bizde aldaǵy ýaqytta bırjaǵa ornalastyratyn aktsııalar úlesi qaraldy. Atalǵan qadam «QazMunaıGaz» ulttyq kompanııasy aktsııalarynyń ótimdiligin arttyrý úshin qajet. Odan túsken qarjy ulttyq qorǵa jiberiledi», - dedi Ernar Janádil «Astana Finance Days» konferentsııasy barysynda BAQ ókilderiniń saýalyna jaýap bere turyp.

Eske salaıyq, byltyr «Samuryq-Qazyna» ulttyq qory ótken jyldyń jeltoqsanynan bastap «QazMunaıGaz» kompanııasyn IPO-ǵa shyǵarýdy josparlap otyrǵanyn habarlaǵan edi.

Buǵan deıin belgili bolǵandaı Air Astana kelesi jyly IPO-ǵa shyǵady.

Sondaı-aq, «Astana Finance Days» konferentsııasy barysynda KEGOC kompanııasynyń bıyl SPO-ǵa shyǵýǵa daıyn ekendigi aıtyldy.