«QazMunaıGaz» Ulttyq kompanııasynyń munaı qory 2022 jyly 1,4 mlrd. tonnany quramaq

ALMATY. 2 qazan. QazAqparat - «QazMunaıGaz» Ulttyq kompanııasy» AQ-nyń dáleldengen qory qazir 823 mln. tonna munaı men kondensatty quraıdy. Bul týraly búgin Almatyda ótip jatqan «Munaı jáne gaz - KIOGE 2013» halyqaralyq konferentsııasynda aıtyldy.

«Biz 2022 jyly barlaýdyń tıimdiligi arqyly teńiz ben qurǵaq jerdegi qorymyzdy 1,4 mlrd. tonnaǵa jetkizýdi josparlap otyrmyz. Kóptegen sheteldik kompanııalar bizben yntymaqtasýǵa daıyn. Jaqynda amerıkandyq Anadarko kompanııasymen kelissóz júrgizdik. Kaspıı shelfinen jańa kenishter izdestirilýde. Al qurǵaq jerdegi munaı qoryn ulǵaıtý negizinen kenishterdi burǵylaýdy tereńdetý arqyly júzege asyrylmaq. Ondaǵy zertteý jumystary 5-ten 8 myń shaqyrymǵa deıingi tereńdikte júrgiziledi», - deıdi «QazMunaıGaz» Ulttyq kompanııasy» AQ-y basqarma tóraǵasynyń geologııa jáne perspektıvti jobalar jónindegi orynbasary Qurmanǵazy Esqazıev.

Gaffney, Cline & Associates táýelsiz aýdıtorlyq kompanııalarynyń baǵalaýynsha, Soltústik Kaspıı jobasynyń qoryn qospaǵanda Kaspıı shelfindegi Qazaqstan sektorynyń áleýeti 2,37 mlrd. tonna munaıdy quraıdy. Qazirgi tańda geologııalyq barlaý jumystary «N», Jambyl, Sátbaev, «Jemchýjına», Mahambet, Bóbek jobalarynda júrip jatyr. Ulttyq kompanııa 2013-2017 jyldary Kaspıı teńiziniń qazaqstandyq sektory men qurǵaq jerlerinde 322 barlaý jáne baǵalaý uńǵymalarynda burǵylaý jumystaryn júrgizýdi josparlap otyr.