«QazMunaıGaz» tóraǵasy Atyraý oblysynda birneshe mańyzdy nysandy aralady

«QazMunaıGaz» UK AQ Basqarma tóraǵasy Maǵzum Myrzaǵalıev Atyraý oblysynda salynyp jatqan polıpropılen óndiretin birikken gaz-hımııa keshenine bardy.

Ulttyq kompanııa basshysy aldymen keshendi paıdalanýǵa berý daıyndyǵyn tekserip, negizgi nysandardy aralap shyqty.

Máselen, propan saqtaý parki, ony degıdrleý jáne propılendi polımerleý qondyrǵylaryn, daıyn ónimdi saqtaý qoımasyn, ortalyq zaýyt zerthanasyn jáne ortalyqtandyrylǵan operatorlar zalyn qarap, jumys barysyna baǵa berdi.

Maǵzum Myrzaǵalıev ınvestıtsııalyq jobany iske asyrýda edáýir jumys atqarylǵanyna toqtaldy. Onyń aıtýynsha, biregeı jobanyń mańyzy joǵary, sol sebepti ol aıryqsha baqylaýdy qajet etedi.

«Birikken gaz hımııa keshenin salý jobasy Memleket basshysy men Úkimettiń erekshe baqylaýynda, sondaı-aq qoǵamnyń da jiti nazarynda», - dedi KPI Inc. JShS-de ótken jıynda basqarma tóraǵasy.

Aıta keteıik, bul keshen Atyraý qalasynan soltústik-shyǵysyna qaraı 33 shaqyrym, Qarabatan stansasynan soltústikke qaraı 8-9 shaqyrym jerde ornalasqan.

Negizinde álemdik arenada polımer óndiretin jáne satatyn jańa óndirýshiniń paıda bolýy, birinshi kezekte, tutynýshylarǵa tikeleı áserin tıgizedi.

Óıtkeni, shıkizat jetkizýshiler aýysyp, qosymsha marka túrleri paıda bolady, sonymen qatar, jetkizýdiń balamaly joldary ashylmaq.

Jylyna 500 myń tonna ónim óndiretin birikken gaz-hımııa kesheni «QazMunaıGaz» ulttyq kompanııasynyń ilkimdi jobasyna aınalyp, kómirsýtekterdiń odan da tereń óńdelýin júzege asyrýǵa múmkindik bermek. Mundaı biregeı jobaǵa «KPI Inc.» JShS jetekshilik etedi.

Búginde bul nysannyń jumysy 99,20 paıyzǵa oryndalǵan. Keshen aýmaǵynda negizgi qurylys jumystary aıaqtaldy, aýmaqty abattandyrý jumystary júrgizilýde. Buǵan ulttyq kompanııa basshysy kýá boldy.

Budan bólek, Maǵzum Myrzaǵalıev Atyraý munaı óńdeý zaýytyna (AMÓZ) bardy. Zaýyt basshylyǵy «Tazalyq» jobasyn júzege asyrýdyń qazirgi nátıjeleri týraly sóz etti.

«Tazalyq» – zaýyttyń aǵyndy sýlaryn tazartý qondyrǵylarynyń jańǵyrtylýyn, sondaı-aq aýdany 860 gektar býlaný alqabyn qalpyna keltirýdi kózdeıdi.

Qazirgi ýaqytta tazartý qondyrǵylaryn salý boıynsha alǵashqy kezeńniń qurylys-montajdaý jumystary 73%-ǵa oryndaldy. Josparǵa sáıkes joba kelesi jyldyń jeltoqsan aıynda tolyq aıaqtalmaq.

Ulttyq kompanııa basshysynyń jumys sapary «Embimunaıgaz» AQ (EMG) keńsesindegi jıynmen túıindeldi.

Embi basshylyǵy «QazMunaıGaz» UK AQ Basqarma tóraǵasyna «Intellektýaldy ken orny» júıesin óz óndiris oryndarynda engizýdiń kórsetkishterimen tanystyrdy.

Joba óndiris nysandarynda tehnologııalyq protsesterge shuǵyl taldaý júrgizýdi iske asyrýǵa múmkindik beredi.

Taldaý jumystaryna óndiristi basqarý, kólikterge monıtorıng júrgizý, arnaıy tehnıkany paıdalaný sııaqty mańyzdy qyzmetter kiredi.