QazMunaıGaz Oral turǵyndary úshin jańa sport keshenin saldy
«Jaiyq Arena» sport kesheniniń ashylý saltanaty QR Týrızm jáne sport mınıstri Erbol Myrzabosynov, Batys Qazaqstan oblysynyń ákimi Narıman Tóreǵalıev jáne QMG Basqarma tóraǵasy Ashat Hasenovtyń qatysýymen ótti.
— Oraldaǵy jańa sporttyq-saýyqtyrý kesheni bolashaq chempıondardy tárbıeleıtin ortalyq ǵana emes, sondaı-aq turǵyndar sportpen shuǵyldana alatyn orynǵa aınalmaq. QazMunaıGaz áleýmettik jaýapty kompanııa retinde óz qyzmetin júrgizetin óńirlerinde áleýmettik jobalar, sonyń ishinde mektepter, balabaqshalar, medıtsınalyq mekemeler men sporttyq-mádenı nysandar salý boıynsha jumysty belsendi júzege asyryp keledi. Bul baǵyttaǵy jumys azamattardyń ómir súrý sapasyn arttyrý maqsatynda jalǵasyn tabady, — dedi QMG basshysy.
20 myń sharshy metr aýmaqty alyp jatqan sport kesheni bir aýysymda 300 adamǵa deıin qabyldaı alady.
«Jaiyq Arena» ǵımaratynda 25 metrlik alty jolaǵy bar basseın, boks, kúres, ústel tennısi, sadaq atý, fıtnes, shaǵyn fýtbol, voleıbol jáne basketbolǵa arnalǵan zaldar, sondaı-aq boı qyzdyrý alańy bar jeńil atletıka arenasy ashyldy.
Jeńil atletıka arenasynyń trıbýnasy 1200 orynǵa eseptelgen. Sport kesheninde iri jarystar ótkizýmen qatar, sportshylardyń jattyǵýyna da barlyq múmkindik jasalǵan.
Jobanyń jalpy quny — 19,9 mlrd teńge. QMG sport keshenin 2023 jyly maýsym aıynda sala bastady. Joba búkil komandanyń, sonyń ishinde merdiger uıymynyń (BI Group holdıngi) úılesimdi ári tıimdi jumysynyń nátıjesinde qysqa merzimde sátti aıaqtaldy.