«QazMunaıGaz Ónimderi» janar-jaǵar maıdyń urlaný faktisin anyqtady

ASTANA. QazAqparat - «QazMunaıGaz Ónimderi» kompanııasynda otynǵa talon urlaý faktisi anyqtaldy. Bul týraly Astana qalasy boıynsha memlekettik kiris departamenti habarlady.

«MTD ekonomıkalyq tergeý qyzmeti janar-jaǵar maı materıaldaryn urlaý faktisine oraı «QazMunaıGaz Ónimderi» JShS-nyń ótinishi boıynsha QR QK 490-baby 4-bóligi 2-tarmaǵyna sáıkes sot aldy tergeý júrgizýde. Qyzmettik tekserý barysynda bólimshe qyzmetkerleriniń jalǵan jeke tulǵalarǵa býhgalterlik esepti burmalap, naqty tólem jasamaı, AI-95, AI-92, AI-80 jáne dızel otynyna talon berý arqyly jymqyrý faktisi anyqtaldy», - delingen habarlamada.

Qazirgi ýaqytta qylmystyq is boıynsha qajetti saraptamalyq zertteý taǵaıyndaldy, osy qylmystyq quqyq buzýshylyqty jasaýǵa qatysty tulǵalardy anyqtaýǵa baǵyttalǵan tergeý jedel sharalary júrgizilýde.

Tergeý nátıjeleri jaıly jurtshylyq habardar etiletin bolady, dep atap ótti vedomstvodan.