«QazMunaıGaz» óndiriletin munaı qoryn 1 mıllıard 600 mıllıon tonnaǵa jetkizýdi josparlap otyr

ATYRAÝ. 19 naýryz. QazAqparat /Andreı Sokolov/ - «QazMunaıGaz» ulttyq kompanııasynyń kenishterinde óndiriletin munaıdyń qory aldaǵy jyldary 1 mıllıard tonnaǵa deıin arttyrylady, dep habarlady kompanııa basqarmasynyń tóraǵasy Qaıyrgeldi Qabyldın.

Onyń aıtýynsha, bul kórsetkish, birinshi kezekte, barlaý maqsatyndaǵy burǵylaýdyń aýqymyn edáýir arttyrýdyń esebinen eselenbek. Tek qana 2011 jyldyń ózinde 21 barlaý uńǵysyn burǵylaý josparlanýda. Bul aldyńǵy jyldardaǵy kórsetkishten úsh ese kóp. «Búginde óndirilip otyrǵan munaıdyń qory 760 mıllıon tonnany quraıdy, biz bul kórsetkishti 1 mıllıardqa arttyrýdy josparlap otyrmyz. Munaıdyń bir bóligi osy kezeńniń ishinde óndiriletinin eskersek, onyń jalpy qory báribir 1 mıllıard 600 mln tonnaǵa artady», deıdi Q.Qabyldın.