QazMunaıGaz mıllıardaǵan aqshany shetelde ne úshin ustap otyr
«Negizinen, bizge qarasty kompanııalardyń aqshasy shetelde jatqan joq. «QazMunaıGazdiki» jatsa, jatqan shyǵar. Biraq kompanııa sol aqshanyń ózin syrtqy qaryzyn tólep otyrý úshin ustap otyr. Máselen, qaryzdy tóleý ýaqyty kelgende sol aqshadan tóleı salady. 1,6 mlrd dollardy myna jaqqa ákelip, odan keıin ana jaqqa aparyp, tólep jatpaıdy ǵoı. Sol jerge salyp qoıǵan. Ýaqyty kelgende tóleı salady. Odan basqa «Samuryq-Qazynanyń» eshqandaı qarajaty, eshqandaı depozıtteri sheteldik bankterde joq», - dedi E.Jańadil QazAqparat tilshisine bergen suxbatynda.
Onyń aıtýynsha, «QazMunaıGaz» ulttyq kompanııasy syrtqy qaryzdy Qashaǵan jobasyn damytý úshin alǵan.
Aıta keteıik, byltyr 6 jeltoqsanda ótken jıynda QR Prezıdenti Nursultan Nazarbaev sheteldegi qarjyny qaıtarýǵa qatysty arnaıy zańnamany ázirleýdi tapsyrdy. Sebebi tabıǵı resýrstardan paıda taýyp otyrǵan kompanııalar óz aqshalaryn shetelde ustaıdy. Prezıdenttiń aıtýynsha, 18 otandyq kompanııa 12,5 mlrd dollardy shetelde ustap otyr. Atap aıtqanda, «Teńiz Shevroıl» kompanııasy - 4,5 mlrd dollar, «QazMunaıGaz» ulttyq kompanııasy - 3 mlrd dollar, «QazMunaıGaz barlaý men óndirý» kompanııasy - 2 mlrd dollar, «Azııa gaz qubyry» JShS - 1 mlrd-tan astam, «Beıneý-Shymkent» gaz qubyry» JShS - 100 mln dollar, budan bólek, «Shyǵys Tsement», «Jaıyq Munaı», Kaspıı qubyry konsortsıýmy jáne taǵy basqa kompanııalar shetelde qyrýar qarajatty ustap keledi. «Nege olaı isteısizder? Qazaqstannyń resýrstaryn satyp, aqsha tabasyzdar? Al tabysty shetelde ustaısyzdar. Nege ol aqsha osynda aınalyp, el ekonomıkasyna jumys istemeıdi? Jarty jyldyń ishinde memleketke qarasty kompanııalar sheteldegi qarjysyn 2 mlrd dollardan 6 mlrd-qa deıin ulǵaıtty. Sizder neni kútip otyrsyzdar?! Men osyny túsinbeımin. Memleket sizderge aqsha jasaýǵa jaǵdaı jasady. Sizder bolsa, ol aqshany memleketten tyǵyp otyrsyzdar. Olaı bolmaıdy», - dedi Nursultan Ábishuly.