QazMunaıGaz merdiger mekemelerdi quramyna qosý máselesine jaýap berdi

<p>ASTANA. KAZINFORM - &laquo;QazMunaıGaz&raquo; basshysy Maǵzum Myrzaǵalıev jumysshylardyń óz kásiporyndaryn memleket menshigine ótkizý týraly talaptaryna jaýap berip, bul máselege núkte qoıdy.</p>

«Byltyr Mańǵystaý oblysyndaǵy ken oryndarynda qyzmet kórsetetin birneshe merdiger uıymnyń jumysshylary ulttyq kompanııanyń shtatyna qabyldaý týraly talap qoıǵany ras. Bul talapty oryndaý múmkin emes ekenin birneshe ret aıtqan bolatynmyn. Bul, kem degende, QazMunaıGazdyń enshiles mekemelerine jumysqa ornalasýǵa kezekte turǵan óńirdegi jumyssyz turǵyndarǵa qatysty ádiletsiz áreket bolar edi», - dep atap ótti M.Myrzaǵalıev QMG baspasóz qyzmetine bergen suhbatynda.

Degenmen, QMG basshysy ulttyq kompanııa merdiger mekemeler jumysshylarynyń eńbek jaǵdaıyn jaqsartý máselesine qatysty talaptardy oryndaýdan bas tartpaıtynyn naqtylap ótti.

«Buǵan deıin de jumysshylardyń talabyn qoldap, osyndaı uıymdardyń birine úsh jyl ishinde 200-den astam tehnıkany jańartýǵa kómektesýge kelistik. Bul kompanııa úshin aıtarlyqtaı soma, dese de osyndaı sheshimge keldik», - dedi ol.

Eske sala ketsek, Mańǵystaý oblysynda 2023 jyly 11 jeltoqsanda «West Oil Software» JShS-niń 400-den astam júrgizýshisi talap qoıyp, jumysyn toqtatqan bolatyn. Narazy top ózderin «QazMunaıGaz» UK quramyna qosý, jalaqyny QMG eńbekaqy tóleý júıesimen teńestirý, materıaldyq-tehnıkalyq bazany jańartý syndy birqatar usynysty alǵa tartqany jarııa boldy. Keıin júzden asa jumysshy óz qyzmetine oralǵan.