«QazMunaıGaz» qoryndaǵy ósim 2,2 mlrd barrel munaı deńgeıinde baǵalandy

ASTANA. QazAqparat – «QazMunaıGaz» kompanııasy qorynyń ósimi shamamen 2,2 mıllıard barrel munaı ekvıvalentin qurady, dep habarlaıdy QazAqparat tilshisi.

«Jalpy qor ósiminiń áleýetti kólemi shamamen 2,2 mıllıard barrel munaı ekvıvalentine jetip tur. Sondaı-aq keler 5 jylda 42 uńǵymada burǵylaý jumystary josparlanyp otyr», - dedi «QazMunaıGaz» kompanııasy qarjy departamentiniń jetekshi mamany Maqsat Baızatov elordada atalǵan kompanııany IPO-ǵa shyǵarýǵa arnalǵan jıynda.

Onyń aıtýynsha, kompanııa óziniń rezervterin arttyrý baǵytynda túrli múmkindikterdi qarastyryp otyr.

Atap aıtqanda, «QazMunaıGaz» IPO-syna qatysý arqyly adamdar munaı óndirý, tasymaldaý, qaıta óńdeý sııaqty qyzmetter usynatyn iri kompanııanyń úleskerine aınala alady. Bolashaq aktsıonerler kompanııa tabysynan dıvıdend retinde paıda kórý quqyǵyna ıe bolady.

«QazMunaıGaz» kompanııasynyń jalpy aktıvteri 32 mlrd dollardy qurap otyr. Dıvıdendter tóleý múmkindigi munaı baǵasyna baılanysty bolady.

Budan buryn habarlanǵandaı, 7 qarashada «Samuryq-Qazyna» qory «QazMunaıGaz» kompanııasynyń ózine tıesili úlesiniń 5 paıyzyn IPO-ǵa shyǵaratynyn resmı jarııalady.

Bul jolǵy ІRO aıasynda «QazMunaıGaz» kompanııasynyń «Samuryq-Qazynaǵa» tıesili 30,5 mln aktsııasy satylady.

Bir aktsııanyń quny 8406 teńge dep belgilengen. ІRO kelesi aıǵa deıin josparlanǵan. Naqtyraq aıtsaq, ınstıtýtsıonaldyq ınvestorlardan (zańdy tulǵalar) ótinim qabyldaý 9 qarashada bastalyp, 30 qarashada aıaqtalady. Al bólshek ınvestorlardan (jeke tulǵalar) ótinim qabyldaý 9 qarashada bastalyp, 2 jeltoqsanda saǵat 15.00-de aıaqtalady. «Samuryq- Qazyna» qory búkil ótinimderdi jınap, maquldaǵannan keıin satylǵan aktsııalar jeltoqsannyń birinshi onkúndiginde ınvestordyń shotyna túsedi.