«QazMunaıGaz» kompanııalary tobynda qazaqstandyq qamtýdy damytý máselesi boıynsha keńes ótti
dep habarlady kompanııanyń baspasóz qyzmetinen.
Keńeste sóz sóılegen «QazMunaıGaz» UK AQ-nyń Basqarma Tóraǵasy Qaıyrgeldi Qabyldın qazirgi kezde QMG UK Qazaqstanda baqylaý-esepteý quraldaryn, burandaly sorǵylar, gaz taratýshy oryndar, túrli elektrotehnıkalyq buıymdar, súzgishter, pakerler, burǵylaýshy qubyrlar, taǵy da basqa ónimder shyǵaratyn 21 jańa óndiris ornyn uıymdastyrý jumystaryn júrgizip jatqandyǵyn atap ótti. Qabyldanǵan sharalardyń nátıjesinde «ÝKAZ» AQ, «KSP Steel» JShS, «FormatMachCompany» JShS, «SAR Tehnologııa» JShS, Elektrıkým Qazaqstan SÚ» JShS, «Shnaıder Elektrık» JShS, taǵy da basqa otandyq kásiporyndarda 600-den astam jumys orny ashylady.
Sonymen qatar otandyq kásiporyndardy kepildi tapsyrystarmen qamtamasyz etý maqsatynda QMG UK aǵymdaǵy jyly uzaq merzimdi sharttardyń somasyn 54 mlrd. teńgege deıin ulǵaıtýdy josparlap otyr.
Q.Qabyldın qazaqstandyq qamtýdy damytý perspektıvalary jaıynda aıta kelip, otandyq kásiporyndar basshylaryn Qazaqstanda jetkiliksiz qamtamasyz etilgen taýarlardy - hımııalyq reagentterdi, zerthana, elektr jaryǵy jabdyqtaryn, elektrli sorǵy agregattaryn taǵy da basqa jabdyqtardy shyǵarý múmkindigin qarastyrýǵa shaqyrdy.
«Qazaqstandyq qamtýdy damytýdaǵy sheshimi qıyn máselelerdiń biri elimizde jabdyqtardyń keıbir túrlerin shyǵarýǵa qýattardyń jetispeýshiligi, baǵasynyń qymbattyǵy, sonymen qatar otandyq kásiporyndarda shyǵarylatyn jabdyqtar men tehnıkanyń álemdik standart sapasyna saı kelmeýi bolyp otyr. Ónim óndirýde básekelestikti arttyrý úshin elimizdiń zavodtaryna jańa tehnologııalar men basqarýdyń aldyńǵy qatarly tájirıbesin engizetin sheteldik áriptesterdi tartý qajet», - dep atap ótti Qaıyrgeldi Qabyldın.
Keńestiń qorytyndysy boıynsha QMG enshiles kásiporyndaryna otandyq taýar óndirýshilerdi josparlanǵan taýarlar jáne jabdyqtarmen qamtamasyz etý máselesin egjeı-tegjeli qarastyrý, sonymen qatar Atyraý MÓZ-inde hosh ıisti kómirsýtekterin óndiretin keshenniń qurylysy jáne Beıneý-Bozoı-Shymkent jobalary boıynsha tender komıssııasynyń quramyna JShS «Atameken» Ulttyq ekonomıkalyq palatasy men Qazaqstan mashına jasaýshylar odaǵynyń ókilderin engizý múmkindigin qarastyrý týraly tapsyrma berildi.
Sonymen birge «QazTransGaz» AQ-yna ERS kelisimshartyna Beıneý-Bozoı-Shymkent jobasy boıynsha merdigerdiń otandyq taýarlardy, jumystar men qyzmetterdi satyp alý jóninde mindettemelerin qazaqstandyq qamtýdyń eń tómengi kórsetkishin kórsete otyryp júzege asyrý tapsyryldy.