«QazMunaıGaz» BÓ munaı óndirýdi ulǵaıtý múmkindigin izdestirýde

ASTANA. 4 shilde. QazAqparat - «QazMunaıGaz» Barlaý Óndirý» AQ (BÓ) elimizdegi eski kenishterden munaı óndirýdi ulǵaıtý múmkindigin qarastyrýda,

dep habarlaıdy Halyqtyq-IPO baǵdarlamasynyń resmı saıty.

Kompanııa óndiretin munaıdyń 70 paıyzdan astamy osyndaı ken oryndarynan alynady. «QazMunaıGaz» BÓ PetrofacLimited kompanııasymen ózara túsinistik týraly tıisti kelisimge qol qoıdy.

«Memorandým taraptarǵa, BÓ-niń 100% enshiles kompanııasy bolyp tabylatyn «EmbiMunaıGaz» AQ (EMG) sekildi ejelgi ken ornynan munaı óndirýdiń ósimin jáne óndiristiń tıimdiligin jaqsartý múmkindigin zertteýge jol ashady», - delingen BÓ habarlamasynda.

Petrofac EMG ken ornyna baǵalaý júrgizedi jáne Embi tobyna kiretin birqatar kenishterdi zertteýdi jáne ondaǵy munaıdy óndirýdi jaqsartý jónindegi usynystardy ázirleıdi. Keleshekte taraptar plastta munaı óndirisin arttyrý týraly kelisimshartqa qol qoıýy múmkin.