QazMunaıGaz ben AirAstana-ny IPO-ǵa shyǵarý sheshimi jazda qabyldanady

NUR-SULTAN. QazAqparat – «QazMunaıGaz» ben AirAstana kompanııalaryn jekeshelendirýge qatysty sheshim bıyl jazda qabyldanbaq. Bul týraly «Samuryq- Qazyna» ál-aýqat ulttyq qorynyń basqarma tóraǵasy Almasadam Sátqalıev málim etti, dep habarlaıdy QazAqparat tilshisi.

«Bıyl 2 aqpanda Úkimet strategııalyq aktıvter kapıtalyndaǵy baqylaý úlesterin mindetti túrde saqtaý jónindegi talappen jekeshelendirýdiń jańartylǵan tizimin qalyptastyrý jónindegi negizgi ólshemderdi bekitti. Qazir biz Úkimetpen osy jańa krıterııler negizinde jekeshelendirýdiń keshendi josparyna ózgerister engizýdi pysyqtap jatyrmyz. Atalǵan krıterııler básekelestik ortada damý perspektıvasy bar kompanııalardyń qyzmetine qatysty. Biz bul kompanııalardy satý, qaıta qurý nemese taratý arqyly olardy básekelestik ortaǵa berýge daıynbyz», – dedi Almasadam Sátqalıev Ortalyq kommýnıkatsııalar qyzmeti alańynda ótken baspasóz máslıhatynda.

Qor basshysynyń aıtýynsha, kompanııalardy IPO-ǵa shyǵarý ońaı sharýa emes.

«Qubylmalylyq trendi búginde barlyq qarjy naryǵynda júrip jatyr. Osy oraıda halyqaralyq ınvestorlardyń bizdiń óńirge degen qyzyǵýshylyǵynyń belgili bir deńgeıde tómendeýi baıqalady. Óz kezegimizde otandyq kompanııalardy kópshilik aldyna satýǵa shyǵarý úlken áleýetke ıe dep sanaımyz. Bul oraıda «QazMunaıGaz» jáne AirAstana kompanııalarynyń daıyndyq deńgeıi óte joǵary. IPO-ǵa shyǵarýǵa qatysty sońǵy sheshim jazda qabyldanady», - deıdi ol.

Sondaı-aq, Almasadam Sátqalıev kompanııalardy jekeshelendirýde geosaıası faktorlardyń da eskeriletinin aıtty.

Eske sala ketsek, bıyl qańtarda Úkimet basshysy Álıhan Smaıylov «QazMunaıGaz», AirAstana men «QazaqGaz» IPO-ǵa shyǵarylatyny týraly habarlaǵan edi.