«QazMunaıGaz» basshysy Bakýde SOCAR prezıdentimen kezdesti jáne Batýmıde kompanııanyń aktıvterin aralady

NUR-SULTAN. QazAqparat - «QazMunaıGaz» UK AQ Basqarma tóraǵasy Maǵzum Myrzaǵalıev Baký qalasyna jumys sapary aıasynda Ázerbaıjan Respýblıkasynyń Memlekettik munaı kompanııasynyń prezıdenti Rovshan Nadjafpen kezdesti.

Taraptar ekijaqty yntymaqtastyq máselelerin, sonyń ishinde Transkaspıı ınfraqurylymyn damytý baǵytynda kompanııalar arasyndaǵy ózara is-qımyl máselesin talqylady. M.Myrzaǵalıevtiń jumys sapary Grýzııanyń Batýmı qalasynda jalǵasty. Basqarma tóraǵasy Batýmı munaı termınaly men Batýmı teńiz portynyń jumysymen tanysty.

2008 jyly QMG-nyń enshiles kompanııasy – «QazTransOıl» AQ Batýmı munaı termınalynyń (BMT) aktıvterin satyp alǵan. Batýmı termınaly Batýmı teńiz portyn 2055 jylǵa deıin basqarý quqyǵyna ıe. BMT kompanııalar tobynyń 2021 jyldaǵy paıdasy 2,5 mlrd teńgege jýyqtady.

Atap aıtqanda, termınal Qazaqstan, Ázerbaıjan, Túrikmenstan, Grýzııa jáne basqa da elderdiń tutynýshylaryna munaı men munaı ónimderin tıeý, quıý jáne jınaqtaý qyzmetterin kórsetedi. Port qurǵaq, úıindi jáne bas júkterdi aýystyryp tıeý, saqtaý jáne qoımalaý qyzmetterin, sondaı-aq kemeler men basqa da kólik quraldaryna qyzmet kórsetedi.