«QazMunaıGaz» basshysy Atyraý munaı óńdeý zaýytyndaǵy qalpyna keltirý jumystarymen tanysty

Keshe Atyraý munaı óńdeý zaýytynda syrtqy jelilerden elektr energııasyn berý isi kúrt toqtady. Sonyń saldarynan kásiporynnyń jumysy tolyqtaı derlik turalap qaldy.

Qazirgi ýaqytta elektrmen qamtý qaıta qalpyna keltirildi. Dınamıkalyq jabdyqtar men qondyrǵylardy kezeń-kezeńimen iske qosý da júrgizilýde. «QazMunaıGaz» UK AQ Basqarma tóraǵasy Maǵzum Myrzaǵalıev atqarylyp jatqan jumystardyń barysymen tanysyp, tıisti tapsyrmalar berdi.

Búgin kásiporynǵa arnaıy barǵan Basqarma tóraǵasy aldaǵy ýaqytta osy ispetti shtattan tys jaǵdaılardyń aldyn alý ári olardyń qaýpin azaıtý maqsatynda tıisti sharalar qolǵa alý qajet ekenin atap ótti.

«Jabdyqtardy iske qosý – retteý jumystaryn qysqa ýaqyt aralyǵynda aıaqtap, quraldardyń jumysqa qabilettiligin qalpyna keltirý kerek. Qordaǵy munaı ónimderin tutynýshylarǵa irkilissiz jóneltý asa mańyzdy», - dedi Maǵzum Myrzaǵalıev.

Óz kezeginde Atyraý munaı óńdeý zaýytynyń bas dırektory Murat Dosmuratov qazirgi qordyń kem degende bir aptaǵa jetetinin alǵa tartty.

«Quraldardy rettep, keıin iske qosý jumystary jalǵasyp jatyr. Sol sııaqty tehnologııalyq nysandardyń jumysyn kezeń-kezeńmen qalpyna keltirý, jabdyqty munaı ónimderi men katalızatorlardan tazartý isi atqarylýda. Zaýytty tolyǵymen iske qosý úshin táýlik boıy 250-ge jýyq jumysshy tartyldy. Búgingi tańda qorda 26 myń tonna janarmaı, 22 myń tonna dızel otyny, 4 myń tonna kerosın bar. Janarmaı men dızel otynyn tutynýshylarǵa jetkizý 5-6 kúnge, kerosın bir aptaǵa jetedi», - dep baıandady Murat Dosmuratov.

Aıta keteıik, zaýytta shıkizatty óńdeý búgin keshke qaıta jalǵasady.