«QazMunaıGaz» Barlaý Óndirý» munaı óndirý kólemin 12 mln. tonna deńgeıinde ustamaq

ASTANA. QazAqparat - Bıyl «QazMunaıGaz» Barlaý Óndirý» AQ 12 mıllıon tonna kóleminde munaı óndiredi. Bul týraly Astanada ótken baspasóz máslıhatynda osy kompanııanyń bas dırektory Abat Nurseıitov málim etti.

«Biz munaı óndirý kólemi jaǵynan Qazaqstanda ekinshi oryndamyz. Jylyna 12 mln. tonnadan astam munaı óndiremiz», - dedi ol.

Sonymen qatar, A. Nurseıitov aldaǵy bes jylda da 12 mln. tonnadan astam kólemde munaı óndirý kózdelip otyrǵandyǵyn jetkizdi.

«Bizdiń kompanııanyń Qazaqstannyń 4 oblysynda, atap aıtqanda, Atyraý, Mańǵystaý, Batys Qazaqstan jáne Qyzylorda oblystarynda 18 enshiles jáne táýeldi uıymdary jumys isteıdi. Búgingi tańda kompanııaǵa qarasty kásiporyndar 25 myńnan asa adamdy jumyspen qamtyp otyr. Jylyna memleket qazynasyna 300 mlrd. teńge mólsherinde salyq tóleımiz», - deıdi ol.

A. Nurseıitovtiń sózine qaraǵanda, «QazMunaıGaz» Barlaý Óndirý» AQ Qazaqstandaǵy áleýmettik jaýapkershiligi joǵary kompanııanyń biri. Sońǵy 10 jylda aımaqtardyń áleýmettik ınfraqurylymdaryn damytýǵa jáne áleýmettik jobalardy qarjylandyrýǵa 45 mlrd. teńgeden astam qarajat jumsaldy.