«QazMunaıGaz» AI-92 markili benzınniń baǵasyn arzandatty

ASTANA. QazAqparat - «QazMunaıGaz Ónimderi» JShS «QazMunaıGaz» maı quıý stansalarynda AI-92 markili benzınine degen baǵanyń bólshek saýdadaǵy baǵasynyń tómendegeni týraly habarlady. Bul týraly «QazAqparat» habarlaıdy. 

«Baǵanyń arzandaýy bir-birimen baılanysty birneshe faktorlarǵa táýeldi. AQSh dollaryna shaqqandaǵy teńge baǵamynyń nyǵaıýy Reseı Federatsııasynan ımporttalatyn otyn baǵasynyń tómendeýine yqpal etti. Buǵan qosa, Qazaqstandaǵy AI-92 markasy qorynyń deńgeıi naryqtaǵy kóterme saýdadaǵy baǵanyń turaqtanýyna áser etedi. Atalǵan faktorlardyń baılanysy «QazMunaıGaz» maı quıý stansalar jelisindegi bólshek saýdadaǵy baǵany tómendetýge múmkindik týdyrdy»,-dedi kompanııa ókilderi.

Buǵan qosa, óndiris kóleminiń ózgerýi, tutyný, qordaǵy ónim kóleminiń jaǵdaıy, QR kóterme baǵa men RF-nan jetkiziletin ımport baǵasy bólshek saýdadaǵy jaǵdaıǵa áser etýi múmkin. Bul rette jekelegen munaı ónimderiniń baǵasy ósýi de yqtımal.

«QazMunaıGaz Ónimderi» JShS janar-jaǵarmaı materıaldarynyń bólshek saýdadaǵy biryńǵaı operatory.