«Qazkontent» rebrendıng jasady

ASTANA. QazAqparat - "Qazkontent" aktsıonerlik qoǵamy rebrendıng jasap, óziniń quramyna enetin birqatar ınternet-resýrsty jańartty. Bul týraly strategy2050.kz saıtynda habarlandy.   

Máselen, «Qazkontenttiń» logotıpi ózgerip, onyń ataýyn budan bylaı, latyn formatynda «Qazkontent» dep jazý uıǵarylǵan. «Qazkontent» quramyndaǵy ınternet-resýrstar álemniń barlyq elderinde oqylatynyn aıta ketken jón. 

Sonymen qatar Strategy2050.kz aqparattyq agenttigi óz ınterfeısin ózgertti. Saıt anaǵurlym tartymdy bola túsip, onymen jumys isteý jeńildedi. Baq.kz aqparattyq agenttigi de habar taratý formatyn ózgertti. 

Budan bólek, «Qazkontent» óziniń jańa ınternet-maýsymyn tanystyrdy. Oǵan sáıkes, AQ-nyń quramyna enetin saıttar jańa formattaǵy jumysqa kóshedi. Usynylǵan saıttardyń árqaısysynda jańa jumys nusqasy, jańa jobalar bolady. Olar oqyrmannyń saıtpen jumys isteýin ońaılatýǵa baǵyttalǵan jáne jańalyqtar sapasyn edáýir jaqsarta túspek.   

Mysaly, «Strategy2050.kz» AA óz resýrsynda "Strategııa" pikirtalas klýbynyń sarapshylaryna arnalǵan alań usynady. Onda onlaın-rejimde  ózekti taqyryptar talqylanatyn bolady.

Onymen qosa, "Qazkontent" óziniń jańa ınternet-kanalyn usynbaq.