Qazirginiń adamy zattardyń tereń mazmunyn kórýden qaldy - «Erarta-2023» úzdigi Tamerlan Tiles
Shymkenttik músinshi Tamerlan Tilestiń jasaǵan týyndylarynan álemdegi sırek zattardy kezdestirýge bolady. Máselen, músinshi «Ómir» atty jumysynda tıranozavrdyń súıegi men temir meteorıt sekildi sırek zattardy qoldanǵan. Sondaı-aq, ol árbir jumysqa qajetti materıaldardy álemniń túrli elderinen arnaıy alyp keledi.
Jaqynda Tamerlan «Tutylý» atty jańa týyndyny jasap shyqty. Adamnyń kózi beınesinde jasalǵan jumysqa baǵaly asyl tastar men sırek kezdesetin metaldar qoldanylǵan. Músinshi olardyń barshasyn álemniń birneshe elinen tasymaldaǵan.
Máselen, pannoda kózdiń qarashyǵy kosmos keıpinde sýrettelgen. Al ortasynda adam tulǵasyndaǵy kishkentaı beıneler bar. Toqtaýsyz aınalyp júredi. Olar bronza men dıdjıtal arttan jasalǵan. Madagaskarlyq labradorıt degen jartylaı asyl tas týyndynyń fonynda tur. Ony Italııadan alyp kelipti. Hrýstaldan jasalǵan búrkit Reseıden jetkizilgen. Mamont tisinen jasalǵan kosmonavtyń materıaly ıAkýtııa memleketine tıeseli.
Jalpy, pannonyń salmaǵy – shamamen 200 keli. Al, uzyndyǵy – 3,5 metr bolsa, eni – 1 metr. Álemdik anımatsııalyq músinshiler men sýretshiler pannonyń qurylymyn Sankt-Peterbýrg qalasynda jınaǵan. Al, negizgi bólshekteri Italııa, Reseı, Qazaqstanda jasalypty. Eńbekte qazaq kosmogonııasy týraly túsinikter men ulttyq dúnıetanym erekshelikteri beınelengenin kórýge bolady. Sondaı-aq, músinshi ulttyq tarıh pen din, dil ejelgi qolóner dástúrleri taqyryptaryna júgingen.
«Jalpy, «Tutylý» týyndysy vızýaldy qabyldaýdan jumbaqqa aınalǵan álemdi kórýge shaqyrady. Kóz beınesinde alýymnyń basty sebebi – qazirgi kezde adamzattyń eki kózi bola tura, zattardyń pishini men syrtqy sulbalaryna nazar aýdarýdy ádetke aınaldyryp, olardyń tereń mazmunyn kórýden qaldy. Sondyqtan, panno kórermendi ǵalamnyń paıda bolý bastamasyna jeteleıdi. Aldymen, onyń kózqarasyn aıqyndap, sonan soń óz jolyn anyqtaýǵa múmkindik beredi. Jaryq álemge kelý bar jáne jumbaq tuńǵıyqtyń qarańǵylyǵyna bet alý bar. Shyǵarma jalpy adamzattyń ómirin kórsetedi», - deıdi músinshi.
Tamerlan jańa týyndysyn birden Sankt-Peterbýrg qalasynda ótken «Erarta-2023» syılyǵyna usyndy. Jalpy, baıqaýǵa álemdik 2 700-den astam sýretshiniń jumystary qatysty. Keıinnen 60 týyndy iriktelip alyndy. Sodan tórt aı boıy kórmege kelýshiler ózderine unaıtyn jumystarǵa daýys berdi. Qorytyndysynda qazaqstandyq músinshi Tamerlan Tiles eń kóp daýys jınap, úzdik dep tanyldy.
«Erarta syılyǵy-2023» ekspozıtsııasyna zamanaýı ónerdiń túrli baǵyttarynyń týyndylary kirdi. Kórermender keskindemeni, grafıkany, músinderdi, ınstallıatsııalardy, foto jáne beıne ónerdi kóre aldy. Maǵan qoldaý bildirgen metsenat Jumabek Janyqulovqa jáne daýys bergen zamandastaryma, qýanyshyma ortaqtasyp otyrǵan jerlesterime kóp rahmet aıtamyn», - deıdi músinshi.