Qazirgi qıyn jaǵdaıda aýyzbirshilik tanytýymyz kerek - Amangeldi Keńshilikuly

NUR-SULTAN. QazAqparat - Synshy, halyqaralyq «Alash» ádebı syılyǵynyń laýreaty Amangeldi Keńshilikuly Memleket basshysy Qasym-Jomart Toqaevtyń málimdemesine oraı pikir bildirdi, dep habarlaıdy QazAqparat tilshisi.

«Qazirgi ýaqytta tek qazaq halqy emes, búkil álem jurtshylyǵy kenetten paıda bolǵan indetpen kúresip jatyr. Árıne, osyǵan baılanysty túrli pikirler, saraptamalar, boljamdar jasalýda. Biraq bul saıası ne basqa da bir jaǵdaılarǵa baılanysty emes, tosynnan paıda bolǵan indet. Odan adamzat birigip qutylmasa, álem úshin indettiń aldyn alý qıyn bolady. Máselen, qazirgi ýaqytta AQSh 6 trln. dollar, Germanııa mıllıardtaǵan eýro bólip jatyr. Osy rette keshegi Memleket basshysynyń da elimizdegi azamattarǵa qarjylaı qoldaý kórsetiletindigin aıtqany qýantady. Jalpy osy ýaqytqa deıin elimizde resmı jumys istep, biraq jumysynan aıyrylǵandarǵa kómek kórsetilse, endi jalpy jumyssyz azamattardyń barlyǵyna qarjylaı kómek kórsetilmek. Bul, menińshe, azamattarymyz úshin úlken qoldaý, kómek bolady», - dedi ol.

Onyń atap ótýinshe, bul indetti tezirek joıatyn bolsaq, soǵurlym elimizdiń ekonomıkasy jyldam qalpyna kelip, ómir tynys-tirshiligi óz arnasy túsedi.

«Bul oraıda Memleket basshysynyń aıtqan sózi, memleket tarapynan jasap jatqan qoldaýy úlken kómek. Árıne, qazirgi ýaqytta biz tek memleketke ǵana arqa súıep qoımaı, bıznesmender, qaltaly azamattar múmkindiginshe muqtaj adamdarǵa kómek kórsetse, nur ústine nur bolar edi. Dál qazirgi qıyn, qysyltaıań, aýyr ýaqytta ózim jaqsy kóretin qazaq ultyn, halqymyzdy sabyrlyqqa shaqyramyn. Biz keshe náýbat zamandy basymyzdan keshirdik. 3 mıllıonnan astam qazaq qyrylyp qaldy. Soǵys kezinde, qýǵyn-súrgin kezinde qanshama qazaq qyryldy. Qazirgi ýaqytta bir jeńnen qol, bir jaǵadan bas shyǵaryp, aýyzbirshilik tanytýymyz kerek», - dedi Amangeldi Keńshilikuly.

Synshy indet kúsheıgen saıyn onymen kúres te qıyndaı túsetindigin basa aıtta kele, árbir azamat otbasynyń, halyqtyń aldyndaǵy jaýapkershilikti tereń sezinýi kerektigine basa nazar aýdartty.

«Árqaısymyz óz otbasymyzǵa indet juqtyrmaýdy, aman alyp qalýdy oılaýymyz kerek. Otbasy múshesiniń biri aýyrsa, dereý dárigerge qaralǵan jón. Aıtalyq, keshe Qyzylorda oblysynda tutas bir otbasy osy indetpen aýyrǵan eken. Sondyqtan barsha Qazaqstan halqynan jaýapkershilikpen qarap, tazalyqty ustanyp, indetten saqtanýdy ótinemin,» - dedi ol.

Aıta keteıik, keshe Prezıdent Qasym-Jomart Toqaev respýblıkalyq telearnalar efırinen málimdeme jasaǵan bolatyn.