Qazir jelilerde bankrottyq rásimdep berýge ýáde etetin alaıaqtar paıda boldy - Erjan Birjanov

ASTANA. QazAqparat – Elorda turǵyndarymen kezdesken Qarjy vıtse-mınıstri Erjan Birjanov bankrottyq rásimdeý kezinde beıresmı málimetterge júginip, alaıaqtarǵa aldanyp qalmaýǵa shaqyrdy, dep habarlaıdy QazAqparat tilshisi.

«Qazir jelilerde aılakerler paıda boldy. Olar «Maǵan 10 paıyzyn berseńiz, men sizdi bankrot dep tanımyn» dep ýáde beredi. Ondaı habarlamalarǵa júginip kerek emes. Sebebi turǵyndar aldanyp qalady. Biz aıtqymyz keledi: bankrottyq protsester tegin túrde ótkiziledi. Bul - memleket tarapynan jasalǵan shara. Sondyqtan buǵan memleket pen azamat qana qatysa alady. Úshinshi jaqtyń bul iske qosylýy tıis emes», - dep málim etti Erjan Birjanov.

Vıtse-mınıstr sózinshe, eger bankrottyqty rásimdeý kezinde alaıaqtyq faktileri anyqtalsa, onda bul týraly aqparat dereý quqyq qorǵaý organdaryna beriledi. Keıin aılakerdiń áreketine tıisti baǵa berilip, qajet bolǵan jaǵdaıda qylmystyq is qozǵalady. Sondyqtan Erjan Birjanov bankrot dep taný jónindegi ótinishter men aqparatty tek melekettik organdardan alý kerektigin aıtty.

Sonymen qatar, Astana qalasynyń turǵyndarymen kezdesip, zańdy túsindirgen vıtse-mınıstr azamattardy bankrot dep taný – qaryzdy keshirý aktsııasy emes ekendigin basa aıtty. Sebebi munyń zańmen retteletin saldary bar.