Qazir túrli máselesi bar 6 myń bala mektepishilik esepke alyndy – mınıstrlik

ASTANA. QazAqparat – Balalardy mektepishilik esepke alýdyń eshqandaı quqyqtyq saldary joq. Ol tek balany kez kelgen problemadan alyp shyǵýǵa baǵyttalǵan. Ortalyq kommýnıkatsııalar qyzmetinde ótken brıfıngide Oqý-aǵartý vıtse-mınıstri Edil Ospan osylaı málim etti, dep habarlaıdy QazAqparat tilshisi.

«Mektep jasyndaǵy árbir balanyń minez-qulqyna synyp jetkshisi, muǵalimder, mektep dırektorlary baǵa berip, olar arnaıy esepke alynady. Árbir balanyń basyndaǵy problemaǵa jeke toqtalyp, jeke taldanady. Bul mektepishilik eseptiń eshqandaı quqyqtyq saldary joq. Ol tek balany kez-kelgen problemadan alyp shyǵýǵa baǵyttalǵan. Qazirdiń ózinde osyndaı 6 myń bala esepke alynyp, qoldaý sharalary kórsetilýde», - dep toqtaldy Edil Ospan.

Bul rette ol balalardyń quqyǵyn qorǵaý men olardyń arasyndaǵy býllıngtiń aldyn alý úshin pedagogterdiń biliktigin jetildirý mańyzdy ekenin aıtty. Sondyqtan muǵalimderge arnaıy kýrstar uıymdastyrylady.

«Mınıstrlik bilim berý salasynda tárbıe jumystaryna basymdyq berip kele jatyr. Synyp saǵattary, ata-analar jınalystary arqyly balalarǵa tónetin qaýiptiń aldyn alý boıynsha ádistemelik kómek, keńester beremiz. Búginde qabyldanǵan júıeli sharalardyń nátıjesin oń baǵalaýǵa bolady. Balalar arasyndaǵy quqyq buzýshylyqtyń tómendeý úrdisi bar ekeni baıqalady. Degenmen sońǵy kezeńderde balalar arasyndaǵy zorlyq-zombylyq, qatygezdik faktileriniń ótken jylmen salystyrǵanda ósýin baıqap otyrmyz. Bul erekshe alańdatarlyq jaǵdaı», - deıdi Edil Ospan.

Vıtse-mınıstr sózinshe bul máselege myna 5 faktor áser etip otyr:

- urpaqtar sabaqtastyǵynyń álsireýi;

- ata-analardyń mekteptegi tárbıe protsesine qatysý deńgeıiniń tómendigi;

- otbasyndaǵy tárbıeniń osaldyǵy;

- ınternettiń ashyqtyǵy;

- pandemııanyń saldary.