Qazir onlaın petıtsııany júzege asyrýǵa eń qolaıly ýaqyt - Aleksandr Danılov

NUR-SULTAN. QazAqparat - Joldaýdy tıimdi júzege asyrý kóptegen memlekettik ınstıtýttyń taǵdyryn sheshedi. «B2C consulting group» basqarýshy seriktesi, Prezıdenttiń kadrlar rezerviniń múshesi Aleksandr Danılov QR Prezıdentiniń Qazaqstan halqyna Joldaýyna qatysty osyndaı pikir aıtty, dep habarlaıdy QazAqparat tilshisi.

«Shyndyǵynda, qazir eldi damytý úshin tıimdi sharalar qabyldaý óte mańyzdy. Qoǵam óz quqyǵyn qorǵap, olardyń saqtalýyn talap ete bastaıdy. Daǵdarystardyń eń jaǵymdy tusy – qalyptasqan qatynastardyń jańǵyrýy. Joldaý qurylymdyq reformalardyń negizin qalady: ákimderdi saılaý qajettiligi jáne tek memleketke ǵana emes, kvazımemlekettik sektorlarǵa da jarııalylyq talap etildi jáne tikeleı onlaın petıtsııalardyń jańa quraly týraly aıtyldy. Internettegi petıtsııalardy engizý ıdeıasy qoǵamda burynnan kele jatqanyn, biraq qazir ony júzege asyrýǵa eń qolaıly ýaqyt ekenin atap ótken jón», - deıdi Aleksandr Danılov.

Onyń aıtýynsha, Memleket basshysy Qasym-Jomart Toqaev qazaqstan halqyna Joldaýynda ekonomıka máselelerine kóbirek toqtalyp ótti.

«Joǵaryda aıtylǵandardan basqa, Joldaýdyń ekonomıkalyq bólimi aýqymdy. Prezıdent bıznes pen úkimet arasyndaǵy qatynastardyń ekojúıesindegi túbegeıli ózgeristerge daıyn ekenin kórsetti, sondyqtan bizdi osy baǵytta belgili bir deńgeıde lıberılızatsııa kútip tur dep oılaımyn. Básekelestik – damýdyń eń jaqsy yntalandyrýshysy, sondyqtan Prezıdentke tikeleı baǵynatyn jeke básekelestikti qorǵaý jáne damytý agenttigin qurý naryq úshin jaqsy belgi bolady», - deıdi ol.

Sonymen qatar, ol Joldaýda qoǵamda burynnan beri qatty synǵa ushyraǵan sátterdiń kórinis tapqanyn, onyń bir mysaly retinde bıýdjet esebinen kásibı sport klýbtaryn ustaý ekenin atap ótti. Sonymen birge, buqaralyq sportqa basymdyq berý usynyldy.

«Joldaýda memlekettik apparattyń tıimdiligin arttyrý, ony qysqartý týraly talap ta bar. Bul da qoǵamda kóp talqylanǵan taqyryptardyń biri. Qazirgi ýaqytta damýdyń jalǵyz ǵana joly bar, ol «Ózger nemese ól» qaǵıdasy. Menińshe, dál Joldaýda qoıylǵan mindetterdi júıeli túrde júzege asyrý sheneýnikterdi baǵalaýǵa tikeleı áser etedi», - deıdi Aleksandr Danılov.