Qazir koronavırýsqa qatysty feık jańalyqtar óte kóbeıip ketti

NUR-SULTAN. QazAqparat – Qazirgi kezde turǵyndar koronavırýsqa qatysty basqa elderde bolǵan eski vıdeolardy bizde bolǵan dep taratýda. Bul týraly QR Aqparat jáne qoǵamdyq damý mınıstri Dáýren Abaev málim etti, dep habarlaıdy QazAqparat tilshisi.

«Qazir koronavırýsqa qatysty feık jańalyqtar óte kóbeıip ketti. Azamattar ózderi de baıqamaı eski vıdeolardy, basqa elderde bolǵan oqıǵalardy bizde bolǵan dep oılap, taratýda. Ártúrli jalǵan aýdıojazbalar tarap jatyr. Oǵan keıbir adamdar senýde. Bunyń barlyǵy qoǵamda úreı týǵyzady. Sondyqtan, taǵy da qaıtalap aıtamyz, tek resmı aqparat kózderin qarańyzdar. Sol jerdegi málimetke ǵana senińizder», - dedi mınıstr «Habar 24» telearnasynyń tikeleı efırinen.

Osy oraıda ol qazir barlyq polıtsııa departamentterinde osyndaı jalǵan aqparattardy jáne ony jarııalaǵan adamdardy anyqtaıtyn arnaıy jumys toptary bar ekenin eske saldy.

«Búginde elimizde osyndaı derek boıynsha 41 is qozǵalyp, tergeý júrgizilýde. Barlyq kináli adamdar zańǵa sáıkes jazalanady», - dedi Dáýren Abaev.