Qazir kıik tóldep, quralaıyn órgizetin sət: Mınıstr elimizde qansha kıik bar ekenin aıtty

NUR-SULTAN. QazAqparat - QR ekologııa, geologııa jáne tabıǵı resýrstar mınıstri Maǵzum Myrzaǵalıev Qazaqstandaǵy kıik sanyn aıtty, dep habarlaıdy QazAqparat.

«Tabıǵat zańy eshqashan óz dəstúrinen jańylǵan emes. Dəl osy kezeń kıik tóldep, quralaıyn órgizetin sət. Mamyrdyń basynda bastalyp, birneshe aptaǵa sozylatyn qazaq aıtatyn «quralaıdyń salqyny» kelip jetti. Ótken jyly saıyn dalamyzda 335 myń kıik esepke alyndy. Ókinishke qaraı, bıyl kıik sanyn əýeden kóktemgi sanaý tótenshe jaǵdaı rejimine baılanysty keıinge shegerildi. Bul jumys kúzde jalǵasady», - dep jazady Maǵzum Myrzaǵalıev Twitter paraqshasynda.

Onyń aıtýynsha, qazir ınspektorlar kıik tólin órgizetin jerlerdi aıryqsha qorǵaýǵa kirisken.

«Kúsh qurylymdarmen birge brakonerlikti boldyrmaý maqsatyndaǵy «Kıik» keń aýqymdy aktsııasy iske asyrylýda. Mamandar da aqbókenderdiń hal-ahýalyn jiti qadaǵalap otyr. Tabıǵat óz perzentine meıirimin tógip, mań daladaǵy kıik sany kóbeıe túsedi dep úmittenemin», - deıdi mınıstr.