Qazir búkil álem tolqyp tur - Máýlen Áshimbaev

ASTANA. QazAqparat - Parlament Senatynyń Tóraǵasy Máýlen Áshimbaev Memleket basshysy Qasym-Jomart Toqaevtyń Túrkistan oblysyna saparyna qatysty pikir bildirdi, dep habarlaıdy QazAqparat.

Onyń paıymynsha, qazir búkil álem tolqyp tur.

«Geosaıası jaǵdaı shıelenisip, halyqaralyq ahýaldyń qıyndaı túskenin bárimiz kórip otyrmyz. Jahan jurty, shyn máninde, kúrdeli kezeńdi bastan ótkerýde. Osyndaı sátte memlekettilikti saqtaý, eldikti nyǵaıtý degen máselelerdiń mańyzy arta túsetini anyq.

Memleket basshysy Qasym-Jomart Kemeluly Toqaev Túrkistan oblysynyń jurtshylyǵymen kezdesýde osy jaıtqa nazar aýdaryp, turaqty ósip-órkendeýimiz úshin el birligi aýadaı qajet ekenin atap ótti. Prezıdentimiz aıtqandaı, birlik – beıbitshilik pen tynyshtyqtyń kepili. Sondyqtan ár iste parasattylyq pen sabyrlyq tanytý elimizdiń amandyǵy men jerimizdiń bútindigi úshin asa mańyzdy», - dep jazdy senator.

Ol qazirgi tańda elimizge kórshi memleketten kelip jatqandar týraly másele kóptiń kókeıinde júrgenin de atap ótken.

«Memleket basshysy osy túıtkilge arnaıy toqtalyp, barlyq isti baıyppen talqylap, aqylmen sheshýimiz qajet ekenin aıtty. Mundaı jaǵdaıda tatýlyqqa taban tireı otyryp áreket etsek, utylmaıtynymyz anyq. Prezıdentimiz bul baǵyttaǵy jumystyń bári eń aldymen ulttyq múddemiz ben elimizdiń turaqtylyǵyn kózdeıtinin aıryqsha atap ótti», - dedi Máýlen Áshimbaev.

Onyń aıtýynsha, eń bastysy, búgingideı almaǵaıyp kezeńde bereke-birligimizge syzat túsirmeýimiz kerek. Bul – jurt bolyp jumylatyn mindet. Qazir memlekettiń tutastyǵyn saqtaý jolynda ult bolyp uıysatyn kezeń. Ony jahannyń búgingi jaı-kúıi anyq kórsetip otyr.

«Sondyqtan bul synaqtan da abyroımen ótip, aldymyzda turǵan barlyq maqsatty sátti júzege asyramyz dep senemiz», - degen Senat tóraǵasy.