Qazir aqshany qaı valıýtada saqtaǵan durys – Ulttyq ekonomıka mınıstriniń pikiri

NUR-SULTAN. QazAqparat – Qazirgi tańda aqshany qaı valıýtada ustaǵan durys? BAQ ókilderiniń bul suraǵyna Úkimettiń baspasóz ortalyǵynda Ulttyq ekonomıka mınıstri Rýslan Dálenov jaýap berdi, dep habarlaıdy QazAqparat tilshisi.

«Bul jerde árkimniń ózindik strategııasy jeke sıpatqa ıe. Bári de ár azamattyń óziniń shyǵynyna baılanysty. Eger sizdiń shyǵynyńyz – ulttyq valıýta, ıaǵnı teńge arqyly shyǵyp jatsa, álbette qarajatty teńgemen saqtaǵan abzal. Al eger shyǵynyńyz basqa valıýta arqyly shyǵyp jatsa, onda qarajatyńyzdyń bir bóligin sol valıýtada saqtaǵan durys. Meniń jeke pikirim osyndaı», - dedi Rýslan Dálenov.

Eske sala ketsek, keshe keıbir valıýta aıyrbastaý oryndary bir dollardy 400 teńgege baǵalap, el ishinde edáýir alańdaýshylyq bolǵan edi.

«Kóp jaǵdaıda kúıgelektik saldarynan bolǵan aýytqýlar bolyp jatyr, ıaǵnı bireýler úshin bul spekýlıatıvtik áreket. Olar osyndaı jaǵdaıdy qasaqana týyndatady. Meniń oıymsha, jaǵdaı túzelýi tıis», - dedi bul jaǵdaıǵa qatysty pikir bildirgen ekonomıst Sergeı Domnın.