Qazyp alynatyn altyn qory 522 tonnaǵa artty — Geologııa komıteti

<p>ASTANA. KAZINFORM &mdash; Qazaqstanda paıdaly qazbalardyń resýrstary men qorlary boıynsha ósim tirkeldi. Bul týraly Geologııa komıtetiniń tóraǵasy Erlan Akbarov aıtty.</p>

— Qazaqstannyń mıneraldyq-shıkizat bazasyna qatty jáne keń taralǵan paıdaly qazbalar, kómirsýtekter jáne jerasty sýlary ken oryndary kiredi. Barlyǵy 987-den astam qatty paıdaly qazbalar ken orny memlekettik teńgerimge esepke alynǵan. Odan bólek, 355 kómirsýtek, 3 666 keń taralǵan paıdaly qazbalar jáne 4540 jerasty sýlary ken oryndary bar, — dedi ol OKQ alańynda.

Sondaı-aq, komıtet basshysy qazbalardyń resýrstary men qorlary boıynsha ósim baryn atap ótti.

— Altyn 522 tonna, kúmis 281 myń tonna, hrom kenderi 2383,1 myń tonna, ýran 44 myń tonna, mys 12893,6 myń tonna, fosforıt kenderi 82 mln tonna, munaı 277 mln tonna, gaz 113 mlrd m3, kondensat 1,9 mln tonna, jerasty sýlary táýligine 155,8 myń m3 ósim kórsetti, — deıdi Erlan Akbarov.

Odan bólek, spıker geologııalyq barlaý nátıjeleri boıynsha 2023-2024 jyldary 60 ken orny esepke alynǵanyn aıtty.

— 27 qatty paıdaly qazbalar, 10 kómirsýtekter, 23 jerasty sýlary ken oryndary alǵash ret memlekettik esepke alyndy, — dep túıdi sózin komıtet tóraǵasy.

Buǵan deıin elimizde geologter qansha jalaqy alatynyn jazdyq. 

Sondaı-aq, «Jas geolog» olımpıadasynyń jeńimpazdary elimizdiń jetekshi 3 joǵary oqý ornynda tegin bilim alýǵa múmkindigi baryn habarladyq.