Qazyǵurtta ótken aqyndar aıtysynda Maqsat Ahanov bas júldeni jeńip aldy

<p>ASTANA. KAZINFORM &ndash; Búgin Qazyǵurt aýdanynda 25 qazan &ndash; Respýblıka kúnine oraı jazýshy, dramatýrg, memleket jáne qoǵam qaıratkeri, &laquo;Qurmet belgisi&raquo; ordeniniń ıegeri, aýdannyń Qurmetti azamaty bolǵan Qalaýbek Tursynqulovtyń 90 jyldyǵyna arnalǵan &laquo;Qazyǵurt bereke, birlik bastaýy&raquo; atty respýblıkalyq aqyndar aıtysy ótti.&nbsp;</p>

Jyr saıysyna respýblıkanyń ár óńirinen kelgen ot aýyzdy, oraq tildi 10 aqyn qatysty. Olar aıtys óneri arqyly elimizdiń egemendigi men táýelsizdik jyldaryndaǵy jetistikterin, ulttar men ulystardyń myzǵymas tatýlyǵy men dostyǵyn, qazaq halqynyń salt-dástúri men ádet-ǵurpyn, túrlengen, gúldengen Túrkistandy jáne kıeli Qazyǵurt óńirin jyrǵa qosyp keńinen nasıhattady.

Bul sóz báıgesine aıtysker aqyn, sazger, jýrnalıst Bekjan Áshirbaev, aqyn, QR Mádenıet salasynyń úzdigi, «Qazyq jurt» jyr jınaǵynyń avtory, aıtys aqyndary men jyrshy-termeshilerdiń Halyqaralyq Odaǵynyń múshesi Bekmurat Anarbaev, aqyn, dástúrli ánshi-termeshi, QR Mádenıet salasynyń úzdigi Aıazbek Rýstamov, Qazaqstan Jýrnalıster odaǵynyń, Qazyǵurt aýdandyq qoǵamdyq keńestiń múshesi, aýdannyń qurmetti azamaty Raıymbek Aıtýbaı qazylyq etti.

Foto: Túrkistan oblysy mádenıet basqarmasynyń baspasóz qyzmeti

Alaman aıtysqa aýdan ákimi Azızhan Ismaılov arnaıy qatyty. Barsha qonaqtar men kórermenderdi, aqyndardy mereıli merekemen quttyqtady. Sondaı-aq, aıtys óneriniń dárejesi bıik, teńdessiz talantty talap etetinin sózge tıek etip, aqyndarǵa sáttilik tiledi.

Foto: Túrkistan oblysy mádenıet basqarmasynyń baspasóz qyzmeti

Qazylar alqasynyń sheshimimen Qaraǵandy oblysynan kelgen Maqsat Ahanov bas júldeni ıemdense, júldeli І oryn Túrkistan qalasynan kelgen Bekarys Shoıbekovke buıyrdy. Júldeli ІІ oryndy Almaty oblysynyń aqyny Aıym Amırhanova, ІІІ oryndy Astana qalasynan Iran-ǵaıyp Kúzembaev, Qyzylorda oblysynan Nurmat Mansur jáne Almaty qalasynan Nurzat Qarý enshiledi. Al Túrkistan oblysynan kelgen Nurlybek Meıirmanov, Nurmahan Jaqypbek, Shymkent qalasynan Meıirjan Jarylqap jáne Qazyǵurt aýdanynyń aqyny Erasyl Jaqsybek aýdan ákiminiń jáne basqa da arnaıy júldelermen marapattaldy.