Qajymuqannyń 150 jyldyǵy: Taǵa ııýden Qazaqstannyń rekordy jańartyldy
Sharaǵa Sport jáne dene shynyqtyrý isteri komıtetiniń tóraǵasy Serik Sápıev jáne Aqmola oblysy ákiminiń orynbasary Aına Mysyrálimova, Qazaqstan sportshylar Odaǵynyń tóraǵasy Azamat Qarlyǵashev qatysyp, quttyqtaý sóz sóıledi.
Aldymen jınalǵandar Qajymuqan aýylynda balýannyń eskertkishine gúl shoqtaryn qoıdy.
Sonymen qatar, sharaǵa jınalǵandar Qajymuqannyń izbasary kúsh jattyǵýynan álemniń tórt dúrkin rekordshysy, Qazaqstannyń on eki dúrkin rekordshysy aqmolalyq Sergeı Tsyrýlnıkovtyń ónerin tamashalady.
Ol ár bireýi 1000 keliden astam salmaqqa des bermeıtin tórt birdeı taǵany 37 sekýnd ishinde ıip, Qazaqstannyń rekordyn ornatty. Rekordty Qazaqstannyń rekordtar kitabynyń ókili Qýandyq Qudaıbergenov tirkep, rekordshyǵa sertıfıkatyn tabys etti.
Aıta ketsek, atalmysh rekord 2009 jyly Eýropa elinde ornatyldy. Onda atlet qos birdeı taǵany 49 sekýnd ishinde ıgen bolatyn.
Aıta keteıik, Sergeı Tsyrýlnıkov - Aqmola oblysy Shortandy aýdanynyń týmasy. Kúsh óneri boıynsha 4 dúrkin álemdik rekordshy, voleıbol jáne paýerlıftıng boıynsha sport sheberi, kir tasyn kóterý boıynsha sport sheberine úmitker, qazaqtyń ataqty balýany Qajymuqan men Balýan Sholaqtyń dástúrin jalǵastyratyn birqatar qaýipti, kúrdeli trıýkterdi oryndaýshy. QR Memlekettik Gvardııasynyń burynǵy ofıtseri. 2017 jyly ol ártúrli baǵyttarda tórt adam tartyp turǵan attardy kóterý arqyly óte qaýipti trıýk kórsetken bolatyn. Osy qoıylym arqyly ol Qazaqstannyń rekordtar kitabyna endi. 2018 jyly ol salmaǵy 148 tonnalyq mashına bar dızeldi teplovozdy birneshe metrge súıregen bolatyn.