«Qajymuqan» fılmi qashan kórermenge jol tartady
«Qajymuqan Muńaıtpasuly týraly buǵan deıin túsirilgen fılmderde orys palýany Ivan Poddýbnyımen kúresken sátteri burmalanyp, tarıhı shyndyqqa qııanat jasalyp keldi. Sonyń ornyn qashan toltyramyz?», -degen suraq qoıyldy ortalyq kommýnıkatsııalar qyzmetinde ótken brıfıngide.
Mádenıet jáne sport mınıstri Aqtoty Raıymqulovanyń aıtýynsha, bıyl jaryqqa shyǵýy josparlanǵan jańa fılmde balýannyń ómirin sıpattaıtyn birshama oqıǵa qamtylǵan.
«2021 jyly Qajymuqan Muńatpasulynyń mereıtoıy ekenin osydan eki jyl buryn bilgenbiz. «Qazaqfılm» arqyly balýan týraly fılm túsirý jumystaryn bastap, stsenarıin jazǵyzdy. Kıno eki jyl boıy túsirildi. Fılmniń túsirilimi aıaqtaldy. Qazir montajdaý jumystary júrip jatyr. Bıyl jyldyń sońyna deıin kórseteıik dep edik, kishkene úlgermeı jatyr. Ózi týǵan Aqmola oblysynyń jerinen búkil jer sharyn aralap, úlken jetistikterge jetkenin kórsettik. Sonymen qatar, ózińiz aıtqandaı, ómiriniń sońynda Ulty Otan soǵysy kezinde óziniń qarjysynyń bárin berip, óziniń atyndaǵy ushaqty jasaǵanǵa deıingi taǵdyrynyń belesterin bárin kórsettik. Meniń oıymsha fılm jaqsy shyǵýy kerek», - dedi Aqtoty Raıymqulova.
Mınıstrdiń orynbasary Nurqısa Dáýeshovtiń aıtýynsha, jańa týynda, túzelip-kúzelip baryp, kelesi jyly kórermenge jol tartpaq.
«Kıno bitti. Qanaǵat Mustafın degen jas rejıserimiz jasap shyqty. Qazirgi tańda muny arnaıy zań boıynsha Ulttyq kınony qoldaý ortalyǵyndaǵy saraptamalyq komıssııaǵa ótkizdik. Olar qazir qabyldap jatyr. Kıno degen shyǵarmashylyq dúnıe. Sondyqtan da keıbir jetpeıtin jerlerin montajdaý jumystary, basqa da máseleleri bolady. Aldaǵy jyly onyń sapaly bolyp shyǵýy úshin mınıstrlik tarapynan da úlken qadaǵalaý jasaımyz», - dedi vıtse-mınıstr.