Qajylyqqa nıettengen júzdegen adamdy álekke túsirgen kásipker qamaýǵa alyndy
Qalalyq prokýratýranyń málimetinshe, kúdiktiniń ústinen Eńbekshi aýdanynyń polıtsııa basqarmasy qylmystyq is qozǵaǵan. Tergeý júrip jatyr.
«Shymkent qalasynyń turǵyndary «Kausar Travel» týrıstik agenttiginiń dırektoryna alaıaqtyq faktisi boıynsha shara qoldaný týraly ujymdyq ótinishpen júgindi. Jedel-izdestirý is-sharalarynyń nátıjeleri boıynsha kúdikti Shymkent qalasy Polıtsııa departamentiniń ýaqytsha ustaý oqshaýlaǵyshyna qamaldy. Qala prokýratýrasy qylmystyq istiń materıaldaryn jáne ustaýdyń negizdiligin zerdelep, tergeý organynyń sot aldynda qamaýda ustaý túrindegi bultartpaý sharasyna sanktsııa berý týraly ótinishin qoldady. Sot qaraýynyń qorytyndysy boıynsha kúdikti adamǵa qatysty tańdalǵan bultartpaý sharasyna sanktsııa berildi. Sotqa deıingi tergeý jalǵasyp jatyr. Tergeý múddesi úshin ózge de aqparat jarııalaýǵa jatpaıdy», - delingen qalalyq prokýratýranyń habarlamasynda.
Aıta keteıik, buǵan deıin júzdegen adam qajylyqqa aparatyn «Kausar Travel» týrıstik agenttigine shaǵymdanǵany jaıly aqparat taraǵan bolatyn. Otyrar.kz habarlaýynsha, joldama satyp alǵandardyń biri Medına qalasyna áreń jetip, onda da dalada qalǵan. Al, endi biri Mekkege usha da almaǵan, aqshasyn da keri qaıtaryp ala almaı júr. Shaǵymdanýshylar qatarynda Shymkent qana emes, Aqtóbe, Almaty men Qaraǵandy qalasynyń turǵyndary da bar. «Jurttyń esebinshe, «Káýsar trevel» týrfırmasyna aldanǵandar sany 300-den asady» delingen edi ktk.kz materıalynda.