Qajet bolǵan jaǵdaıda qaıtadan karantın engizýge daıyn bolý kerek - DDSU

NUR-SULTAN. QazAqparat - Dúnıejúzilik densaýlyq saqtaý uıymynyń bas dırektory Tedros Adanom Gebreısýs búkil memleketterdi halyqtyń kem degende 70%-yn koronavırýsqa qarsy ekpemen qamtamasyz etýge jáne qajet bolǵan jaǵdaıda sanıtarııalyq shekteýlerdi qaıta engizýge daıyn bolýǵa shaqyrdy, dep habarlaıdy QazAqparat.

DDSU málimetinshe, qazir 70% kórsetkishke tek 57 memleket qol jetkizdi, álemde vaktsınatsııanyń ortasha deńgeıi - 60%.

«Barlyq aımaqtarda ornalasqan 70-ke jýyq elde COVID-19 juqtyrý jaǵdaılary týraly habarlamalar sanynyń ósýi baıqaldy jáne bul álemde testileý kúrt tómendegen kezde oryn alady», - dedi DDU basshysy.

Gebreısýs álemde koronavırýstyń taralý joly men qarqynyn boljaý múmkin emes ekenin atap ótti.

100% vaktsınatsııalanýǵa tıis eń osal toptar — medıtsına mamandary, 60 jastan asqan adamdar jáne densaýlyq jaǵdaıy nashar adamdar.

31 mamyrda álemde COVID-19 koronavırýsyn juqtyrýdyń 532 210 230 jaǵdaıy tirkeldi.

Sońǵy táýlikte juqtyrǵandar sany 387 804 adamǵa ósti.

Álemde koronavırýs ınfektsııasynan qaıtys bolǵandardyń jalpy sany - 6 312 017 adam. Sonymen qatar búginde 691 ólim tirkeldi.

Vırýstan tolyq emdelgender sany: 503 169 548 adam.