«Qazgıdromet naqty boljam bermeıdi» – Ekologııa mınıstriniń pikiri qandaı

ASTANA. QazAqparat – Ekologııa jáne tabıǵı resýrstar mınıstri Zúlfııa Súleımenova «Qazgıdromet aýa raıyna qatysty naqty boljam bere almaıdy» degen synǵa qatysty pikirin bildirdi, dep habarlaıdy QazAqparat tilshisi.

«Biz máseleni kóterdik. Qazgıdromet boljamynyń sapasy olardyń gıdrologııalyq jelisiniń qanshalyqty jan-jaqty tarmaqtalǵanyna baılanysty. Gıdrologııalyq boljam jasaý úshin kórshiles elderden – Qyrǵyzgıdromet pen Ózgıdrometten derekter alynady. Jalpy, Shý-Talas basseıni boıynsha boljam jasalǵan kezde, negizinen Qyrǵyzgıdromet boljamdaryna súıendik. Degenmen, shynymen de Qazgıdrometke gıdrologııalyq beketter jelisin keńeıtý qajettigine qatysty másele bar. Óıtkeni, qamtý barynsha keń bolsa, boljam da naqtyraq bola túsedi», - dedi mınıstr Úkimet otyrysynan keıin BAQ ókilderiniń saýalyna oraı.

Sonymen qatar vedomstvo basshysy qosymsha qar ólsheý baǵdarlaryn ashý qajettigine toqtaldy.

«Biz bul máseleni de kóterip, Sý kodeksine qostyq. Degenmen, gıdrologııalyq boljamnyń ózi tsıklonǵa baılanysty bolǵandyqtan, keıde boljamnyń rastalmaýy múmkin ekendigin de túsiný qajet. Mundaı jaıt eń damyǵan elderdiń ózinde de bolyp turady. Biraq, gıdrologııalyq jelilerdi keńeıtý qajettigi sózsiz. Bul josparymyzda bar. Kestesin jasap qoıdyq. Bıyl osy baǵytta jyljımyz», - dedi Zúlfııa Súleımenova.